2016.02.18

延續厝邊狗仔囝想媽媽的心情

情緒倒轉去蹛仁愛彼段歲月。

我蹛的第3寢室，後尾一排洗手台，洗手台頭前是一堵拄厝尾頂的壁，有開一个足細的窗仔，這馬回想起來，大概15公分左右爾。

對彼个窗仔口，會當佇寢室後壁看甲學校大門口。

蹛學舍的生活，日時讀冊，暗頭仔佇教室『晚自習』；佇教室是老師咧照顧，每一个寢室有一个『保育老師』，照顧阮日常生活。

我拄入去彼年，照顧我的是一个上海姑娘郭老師，伊袂曉講台語、我袂曉講國語。

伊真疼我，講我『很寶』，的確是因為國語講袂標準，講的話定定引邊仔的人哈哈大笑；我問伊『寶』是啥？伊講我『打破砂鍋問到底、還問砂鍋在哪裡？』我又閣問『砂鍋』是啥乜？彼時我真正毋知影！

放假的時，伊會共我的棉被mooh【抱】入去伊細細間仔的房間，予我佇內底睏中晝。郭老師的疼愛，是我生命中真深的記持。

頭一遍轉去厝裡歇寒的時，阮伊呀問我講，伊若去學校看我，是毋是佇伊離開學校的時，我會lûi-tui【就是現在說法的［番啦］】？若無，郭老師汰會共講，叫伊呀若無閒，毋免捷捷去看我？

無啊！雖然講，我的感情真氾濫，毋拘行為真節制，郭老師閣較疼我，我嘛知影伊毋是厝內的人，我想阿娘的心情，家己吞落去腹肚底，袂佇伊面頭前lûi-tui。

是按怎郭老師會按呢吩咐咧？

後來我想想咧。大概就是伊呀來學校看我，欲轉去的時，我攏會走去寢室後尾洗手台遐，對彼个細个窗仔口，看伊呀離開校門口，一直看、一直看、看甲伊的身影漸漸仔無看見！

阮伊呀行路- - -足好看的……