2016.01.24

拄才去走廊晾衫。

真gàn、若像去tn̄g著故鄉ê彼个冬天。

細漢時，熱人ê風是圓ê，吹袂入去厝內面；寒人ê風是扁ê，細細縫仔ê門縫都軁會過，閣無講，阮蹛ê是竹管仔厝，規間厝全全縫。

流浪ê風總mah欣羨有一个溫暖ê家；伊定定軁入來阮厝，想欲分寡仔燒烙ê溫度。

從我會捌，因為跤袂行，袂行ê正跤循環無好，冬天若像不管時紮一枝枝仔冰過冬天。

眠床ê棉被，碇碇koh 冷冷，仙睏睏袂燒。我家己都真驚去kha̍p著ê這肢跤，阮伊呀，做我ê阿娘毋驚寒，暝時leh睏，定定用伊燒燒ê雙跤，挾我冷冷ê跛跤，予我燒燒好落眠。

大漢了後捌問爸母，是按怎特別疼我？

阿爸講，伊leh飼豬，一水豬仔若有一隻較飼袂活ê，豬母總是特別照顧彼隻豬仔；這是做人爸母ê天性...啊！原來我是彼隻siau-phiaⁿê豬仔囝。

冷冷碇碇ê棉被，佇我離開故鄉去仁愛學校讀冊了後，煞成做我上深ê思念。

阿母決定欲送我去仁愛讀冊ê時，離報名、考試ê時間真逼，彼个年代庄裡無人裝電話，寫批來回時間愛誠久，袂赴參去佇台北ê阿爸參詳，當然嘛袂赴叫阿爸寄錢轉來（阿爸嘛無一定有錢通寄轉來）。

欲去蹛學校愛hak真濟日用品，其中上大項ê，tō是兩領棉被。一領蓋、一領tshu，厝裡無錢，阮表叔羅老師佇國校仔教冊，伊講欲募款予我去讀冊。阮阿母毋肯，講伊無愛予我欠人一世人ê人情債。後來阿母招一陣會仔予我去讀冊。

仁愛學校佇和美郊外，彼陣仔四箍圍仔攏無厝，是一个真生冷ê所在。阿母聽人講，若照學校規定寸尺ê棉被蓋袂燒，tō請leh拍棉被ê二姑丈，拍兩領較大領ê棉被，予我紮去。

寒人，蓋著阿母替我攢，比別人較厚、較燒ê棉被。毋知按怎，我猶是思念厝裡彼領棉被。

懷念藏佇冷冷碇碇棉被內底...阿母溫暖ê疼愛。