2016.01.09

小路仔這坵田，在來攏種稻仔較濟。

頂日仔稻仔割了，田犁做一埒一埒，知影毋是欲播秧仔ê田。

無偌久，種落來我毋捌看過ê菜栽仔....

若像thàm-ma-to͘h【蕃茄】、嘛若像是菜頭。

無偌久...開花矣....

看著花開，我略略仔知影，毋是thàm-ma-to͘h，因為thàm-ma-to͘h會旋藤，伊無旋藤tō開花，葉仔嘛愈看愈無成菜頭...

想講，花若開，果若結，我毋相信我毋捌伊。

會記一遍看一个阿伯仔tī溪仔邊種菜，彼菜栽是我毋捌ê；就問阿伯遐是啥菜，應講：烏骨仔！

怪嘍，枝葉攏無一項是烏ê，汰會叫做烏骨仔。

後來開花結果...原來是『秋葵』日語叫オクラ，音倚烏骨仔。咱台灣人有夠天才，按呢翻譯外來語，嘛是趣味啦！

小路仔這坵田ê菜

花開了，謝了...煞無看著結果！

欲閣予我臆偌久hàⁿ？足想欲掠一个過路人來問講，這是啥菜？

毋拘，對小路仔經過ê人，攏是趕欲上、下班ê人，無人像我遮閒。

我是『農夫ê女兒』呢，汰會毋捌這種菜？真漏氣！

這日，閣踅對遐去，拄好看著一个我熟似ê阿桑咧薅草，tō倚來請教伊。

伊掠我看一下，講：「hǹg！taⁿ這汝煞看無？馬鈴薯啦！」

：「ah知！阮兜都毋捌種這。」

：「啊汝毋捌食過哦？」

定定咧食啦！毋拘買來ê馬鈴薯，攏嘛無kuah葉仔，我欲汰會知伊tī田裡生做這款ê。

囥tī內心成個月ê疑問，得著答案，有夠歡喜ê。

原本掠準講我是庄跤囡仔，無毋捌看過ê菜，就像未學寫台語文ê時，叫是講，我講ê台語上標準，嘛無我袂曉講ê台語....學寫台語文了後，才知影，天地ê闊，毋是我有才調去測度ê。

一定閣有足濟菜，我毋捌伊；就像台語ê世界，閣有真濟愛學習ê所在。

tō像- - -測度【chhek-to̍k 推測】，這是佇白話字讀冊會潘老師拄教著ê詞，一定有閣較濟我毋捌聽過ê詞，藏tī台文ê世界！