2016.01.02

伊問我今仔日有想欲出去行行咧無？

我應好！

問我想欲去佗？

我講...出去tō好，佗攏會使得。

決定下晡欲坐快樂馬車出去逍遙一下。

中晝食飽毋敢iân-tshiân【遲疑】，碗緊洗，內心有欲去約會ê歡喜，

家事做了，拄欲入去房間穿鐵鞋，聽著厝頂有sà- -sà- -sà ê聲；彼啥？

開門一看，咧落雨綿仔。

雖然阮毋是羊妹仔毋驚落雨，毋拘、快樂馬車有電池，浸著水總是較無好。

按呢、只好予下晡閒閒無代誌。

這種天氣，閒閒無代誌，睏上好！

無夢ê睏眠，毋知睏甲第幾殿。眠眠仔，當做是早起時，聽著巷仔ê囡仔耍甲kì-kà-kiò，看床頭ê sî-kóo-á【鬧鐘】，五點捅仔。是啥代誌，哪會透早囡仔就耍甲遮大聲；斡頭看身邊；床位空空，想講伊去便所，等一睏仔，伊無入來，聽著後間仔咧做穡ê聲，咦？穡頭有遐趕？等袂赴天光？

想講...早頓欲攢啥予食咧？這个時陣閣看一遍sî-kóo-á，六點未到，一般伊六點外食早頓，按呢我會使閣bî一下....

：「貢丸、貢丸、新竹貢丸！」

毋著啊！這擔賣貢丸ê，攏嘛是尾暗仔才來咧賣，今仔日是食毋著藥仔哦？哪會透早tō來咧賣？

這時陣雄雄想起來...啊！我是咧睏中晝，煞將尾暗仔當做早起時.....

莫怪今仔日啥乜攏反常。

［睏死去］ê經驗，這毋是頭一擺。

彼年，國校仔三年ê歇熱，阮阿母按算欲送我去仁愛學校讀冊，愛通過考試才會使入去讀，阮阿母在來無咧管阮ê功課，欲讀、毋讀，讀好、讀bái，攏是阮家己ê代誌。毋拘彼站仔，伊總是叫我著看冊，驚我考袂tiâu。

有一下晡時仔，我佇中間仔圓桌仔遐咧讀冊，西照日ê厝，真熱。讀讀咧soah睏去，tō像今仔日按呢，睏甲真落眠。嘛毋知睏偌久，聽著門口埕囡仔咧耍，天略略仔暗暗，像透早拄天光ê光線。

嘛是像今仔日按呢，想講...哪會透早tō有人佇門口埕咧耍？灶跤阿姐咧煮飯，彼个聲、毋是煮早頓ê聲。煮早頓佮煮暗頓ê聲怎分別？我袂曉講，毋拘我知影。

彼是真久以前ê代誌矣，袂記得彼遍是按怎精神ê。

今仔日又閣倒轉去幾à十年前彼下晡ê- -『不知道是早晨、不知道是黃昏！』

真特別ê感覺；因為有細漢時仝款ê經驗，所以我知影，這、毋是『老人痴呆』哦！