2015.12.24

雖然已經過一工矣！

彼个面容、彼个喉叫ê聲音，iáu 留tī我ê腦海中。

昨暝倚9點，唯老街一間店裡行出來，聽著喉叫聲；若像咧參人冤家，毋拘聽袂出來有人回答伊。

前看後看，雖然路燈光光，嘛是有淡薄仔驚驚。　　

機車起行，才看著原來是土地公廟內底，有一个人，手舉三枝香，一直拜、一直唸。

暗矣，邊仔有人咧拭桌頂，若像準備欲收擔的款（咦？廟敢會關門？），拭桌仔ê人，若像已經足慣勢這个情形。我看咧拜彼ê人ê外表，略仔像中風了後ê身體，閣略仔像『腦性麻痺』ê形；手舉袂懸、話講袂清。　　

因為看伊表情痛苦，我足好奇，認真共聽一時仔，一句都聽無。看伊痛苦ê表情kah 聲音，料想伊應該有真濟委屈，想欲共神講。是按怎ê人生，會佇神的面頭前，喉叫kah 遮呢仔淒涼咧。　　

內心替伊祈求諸天善神，一定愛保庇伊。

雖然我聽無、祢是神、一定聽有伊咧求啥才著！