2015.11.23

合意【kah-ì 喜歡】接受這種ê挑戰；有淡薄仔困難、koh有淡薄仔成功ê成分tī內底。

張老師是我國中ê老師，我頭一遍參加合唱團，就是張老師教ê。伊這馬退休矣，tī台中教輪椅舞；kah我是國校仔、國中lóng是同學ê桂娜，是舞者之一。

怹欲辦輪椅舞成果發表會，tī阮拄咧準備咱復健協會30週年表演合唱ê時，桂娜問講『一團亂』欲去怹hiah表演否？欲留兩條歌ê時間欲予阮。彼時毋敢擾亂合唱班同學練歌ê心情，一直到kah週年慶上台了ê第2工，請教合唱班老師賴校長ê意見，講…可！

彼陣仔開始，阮就開始為著欲hānn過濁水溪去台中上台，加強練歌。因為是去外地表演，袂使凊彩得。

21日透早七點外往台中出發。

殕殕ê空氣，共『上台症候群』逼來到嚨喉蒂仔，因為前一暗練唱，猶是無偌理想，內心一直咧想；敢會徛tī台頂thut-tshuê【出差錯】？音響敢會合咱欲挃ê，彩排時間敢會赴？想kah尾矣…毋敢koh想。

佳哉會赴tī節目未開始進前，揣著表演ê所在- -『台中方舟音樂藝文展演空間』，問負責音響ê先生，阮欲用ê『廣角麥克風』敢有，想欲彩排一下。講伊是負責放音樂爾，mái- kuh【麥克風】毋是伊負責。

若按呢，就請伊放阮音樂伴奏êＣＤ片仔，結果煞讀無。會記得頂年仔，有一遍欲上台ê時，嘛是機器毋食片仔，阮就無法度唱歌。佳哉咱阿娟有紮『隨身碟』，機器欲食，若無、一tsuā【一趟】路遮遠，無上台koh坐車倒轉去，毋知欲用啥乜心情面對….。

感謝上天，所有ê問題lóng得著解決，予阮有機會徛台頂順利演唱。

節目結束了後，請張老師佮桂娜鬥陣啉一杯仔咖啡。張老師講，伊以早訓練阮合唱團，嚴格要求阮認捌譜；真拄好，這抑是阮這馬ê老師賴校長所要求ê。

四十外年矣，阮猶會記得去台中中興堂上台ê心情，唱ê是搖囝歌，三部合唱；張老師講伊嘛會記得，原來、毋是干單阮會懷念仁愛歲月ê合唱團爾，老師教過濟濟的學生，猶會記得當初的阮，真是奇妙的緣份。

回程ê車底，雖然真悿，毋拘逐个lóng真歡喜，談論著這遍ê遠征種種ê心情。

阮一班六个人，歲數加加咧嘛三百外歲矣。這个年歲，koh會當有名師指導，像行tī夢境遐呢仔快樂ê合唱班，實在好貓運啊！阮會珍惜！

感謝賴校長不離不棄，予阮上好ê指導；有時koh愛讓出來怹兜ê客廳，予阮踳踏、予阮練歌。真多謝！