2015.11.16

早起欲出門進前，聽著貓仔tī二樓真驚惶ê hoah聲，我驚上班袂赴無起哩看，叫貓咪落來，叫袂來；雄雄聽著一聲物件落落來塗跤ê聲音，貓咪兇狂傱落來，我看伊驚甲按呢，伸手欲共惜惜一下，伊煞反常反抗，唯嚨喉發出來「hm̀-hm̀」叫ê音聲，規身軀毛仔tshàng-tshàng，目光一直相唯樓梯遐，若像拄經歷一場苦戰，嘛若像隨時準備應戰；敢講樓頂….有鬼？！貓咪汝莫驚我，我真無膽嘿。

貓咪毋予我安慰伊ê驚惶，我就像往過欲出門按呢，用飼料siâⁿ伊去後壁間，緊開門出來，按呢伊才袂綴我出門。

倚晝，阿勳唯外口轉來，khà電話予我，聲音真緊張問講：是按怎咱兜有兩隻貓？定佇外口趖彼隻麒麟尾ê貓，走入來咱兜！

hăⁿ？！兩隻貓？我汰知？

將早起欲出門時貓仔ê情形講予聽。後來伊講，伊嘛感覺奇怪，我若欲飼第2隻貓，應該會參伊講一聲才著。