2015.11.11

今仔日白話字讀冊會，將聖經舊約頭一篇- -「創世記」讀完ah。

潘老師用8个禮拜， tō 是1禮拜1个暗頭仔8-10點，教阮讀完白話字ê「創世記」。

好朋友燕子是基督徒，伊知影我leh讀聖經，講伊真愛聽用台語講的聖經，叫我錄一篇主禱文予伊。

文無長，我錄予伊，伊聽著了後袂輸抾著寶咧，歡喜kah ，講伊就是愛聽這種ê口音；了後歹勢歹勢講，敢會使閣錄一篇詩篇內底ê一个章節。

當然無問題。

會記得阮阿爸捌共我講，咱若有能力ê時陣，著做寡仔對社會有路用ê代誌。

當然用台語讀聖經予朋友聽，彼毋是偌大ê代誌，毋拘，我想講，這是因為我好運，有潘老師教白話字，才有法度用古早人ê口音唸聖經予朋友聽。

白話字對台語口音ê保存，有真大的路用。

阮會想講...汰無較濟人來讀leh？

讀白話字並毋是真困難ê代誌，若有心、毋免偌巧，像我這範ê都讀有ah；閣無講；巧巧ê你！

下禮拜開始，欲讀「出埃及記」；你若有興趣，開始來讀嘿。