Chng-á

Gín-á tńg lâi chham ka in tông-chhong ê hun-iàn

Éng kòe I ê pêng-iú nā kiat hun

Thiap-á ē seng kià lâi chhù—lí

Mn̄g I chit pái thài bô khòaⁿ tio̍h thiap-á

Ìn kóng siuⁿ bān kóng beh chham-ka , bē hù kià, kóng èng-kai bē piak toh

guá thiaⁿ I kóng 「piak toh」nn̄g jī

Kiò I koh kóng chi̍t piàn

I koh kóng chi̍t piàn hōo guá thiaⁿ----「piak toh」！

Hoat im chin tsìng khak,nâ-âu hit im（k） ū hoat chhut- -lâi

guá thiaⁿ chin chē siáu-liân-á ē kóng chò 「piah-toh」

bē bái！gín-á tī tâi-pak hán ni kóng tâi-gí koh ē kì tit chit ê im ,hōo guá chin hoaⁿ hí

Beh chài I khì hué chhia thâu ê sî

I khòaⁿ-tio̍h têng-á-kha ū chi̍t tui chng-á

Mn̄g guá kóng：he 「chng-thâu」 sī tuì toh lâi ê？

Ah ？！chng-thâu ？he kiò chng-á m̄-sī hôa-gí ti̍t hoan chò 「chng-thâu」！

Sī kóng í keng tsiânn hó ah

tio̍h khah tsia̍p tńg lâi kò͘ hiong ,chiah ê tàng kì koh khah chē ê bó gí heh。

【漢字版】

囡仔轉來參加怹同窗的婚宴

往過伊的朋友若結婚

帖仔會先寄來厝裡

問伊這遍汰無看著帖仔

應講siuⁿ慢講欲參加，袂赴寄，講應該袂逼桌。

我聽伊講［piak toh煏桌］兩字

叫伊閣講一遍

伊閣講一遍予我聽…. 「piak toh煏桌」！

發音真正確，嚨喉彼音（k）有發出來。

我聽真濟少年仔會講做「piah-toh壁桌」

袂bái！囡仔佇台北罕呢講台語，閣會記得這个音，予我真歡喜。

欲載囡仔去坐火車的時

伊看著庭仔跤有一堆磚仔

問我講：彼「chng-thâu磚頭」是對佗來的？

啊！？庄頭？

彼叫做磚仔，毋是華語直翻做「chng-thâu磚頭」

是講，已經真好矣

著較捷轉來故鄉，才會當記閣較濟的母語嘿。