2015.10.29

透早起床了後先食水果，才食早頓。阿勳這ê習慣差不多有十外年矣。

伊食食【tsia̍h-si̍t　飲食】雖然撿食，毋拘若是水果，伊真少無愛食ê，連寒人的木瓜味真重，伊嘛講好食。

菝仔是我定買的水果；因為免削皮、免切開，洗洗咧就會使食。

是講，雖然講免切，我嘛是切幾何年，伊才共我講伊較愛規粒gè【啃】。hò͘n！毋早講。

大約佇成半年前開始，菝仔貴甲會講話，買一暫仔別項水果，其實嘛是貴。頂日仔就閣倒轉來買菝仔。

彼工提一仟箍予賣菝仔ê頭家，伊入去厝裡提零散ê欲找。我聽坐tī菝仔擔遐四、五个人leh開講。

有人講：菝仔毋好拜。

有人講：釋迦嘛袂使拜。

有人講：to-ma-to【蕃茄】嘛是袂使拜。

….. …. ….

有人問是按怎遮个水果袂使拜？

有人解說講：因為彼有籽！

有人閣問：啊真濟果子攏嘛有籽。像木瓜、龍眼…

我聽in按呢會，想著我知影的典故

就共in講：彼是因為以早用大肥沃菜，內底有咱袂消化果子的籽，落落下塗生出來果子欉，這種果子欉生出來ê果子，人感覺［不淨］，若提來拜是不敬，所以…若予咱食落腹肚底閣，有籽會予放咱會出來ê果子，就人較無愛提來拜。

其中一个較老輩的講：哈！有道理，是講這馬無咧用大肥啊啦！

因為無咧沃大肥，所以，我啥乜攏嘛共提來拜。

人講若有誠意，干但食水都會甜；閣無講咱專工去市仔買水果轉來拜，這款誠意，敢袂比水較甜？！