～傍晚時分母親在灶咖無閒.我參老爸在外口打羽毛球...吃飯了是母親溫暖的呼聲...幸福的滋味...四十多年了畫面時時重現...～（以上取自願徹臉書）

二姐佇伊的面冊按呢寫，予我想著彼張寂寞的明信片…

彼年國中歇熱進前，學校張老師予阮的暑假作業，是看電視一个有關動物的節目，佮鉸報紙內底動物的資料。

彼年代電視干單三台，歇熱了後，電視tsūn【轉】過來、tsūn過去，就是揣無老師講的彼个節目，彼陣仔無電話（當然嘛無網路），內心真急嘛無法度，佳哉厝裡有訂報紙，暑假作業完成一半爾---絞報紙。
　
彼是一个得欲開學的尾暗仔，阿姐怹佇門口拍羽毛球，我袂曉拍，毋拘足愛鬥鬧熱，徛佇外口窗跤看怹拍，窗仔門外口掛一个收批的信箱，彼日毋知想著啥，伸手入去摸看咧……！
　
啊！內底有一張明信片，夾佇信箱內底，抽出來一看，是成個月前寄出來的，寄的人是同學黃功勳。問我電視動物節目是毋是無咧播…等等問提。是咧等我回批呢。
　
這聲慘矣。因為若欲回，恐驚仔開學進前批寄袂到位，伊就去學校矣、若無回…伊是一个閉思【個性內向】的同學，驚仔伊會想做我刁工【故意】無愛回伊。
伊是提出偌大的勇氣，才敢寄批予我啊！我汰會遮無細膩？！
　　
後來….
著哦？後來按怎處理？

我已經袂記得矣。
我卻是永遠會記得，當我看著寄批日期，內心毋甘守佇信箱內底成月日彼張［寂莫明信片］的心情！