下晡參阿勳去踅家樂福。看著架仔頂的［阿華田］，彼个腹肚枵甲擋袂牢的早起時，佇西螺路邊買的彼杯阿華田，芳甜的氣味，永遠難忘。

彼時翁婿事業真無閒，囡仔度晬了後，伊呀轉去台北，阮開始家己tshuā【帶】囡仔，阿勳佇厝裡做穡兼顧囡仔、我負責外口走業務；穡頭濟、囡仔雖然是袂歹tshuā，毋拘欲睏的時齣頭一大堆，愛用真濟時間騙伊睏，穡頭等欲做，囡仔毋睏，實在堪袂去，定定發性地

到今，阿勳常在咧餾：彼當陣定定囡仔哭、大人綴咧哭！

阿勳講伊師仔出身的，穡頭無閒是四常的代誌。
阮汰會知？未嫁進前做會計，日頭落山就無代誌，下班了等食飯，哪知有人頭路著做甲半暝三更，雞咧啼閣袂當歇睏的？

有一早起出門進前無閒甲無食。
去到西螺，業務處理好勢倚晝矣。雄雄感覺腹肚枵甲規身軀無力，我家己一个袂慣勢佇外口食物件，彼時陣檔袂牢矣，就去買一杯燒燒的阿華田，啉落去...哇！有夠讚，氣力攏來矣。就芳到這當今。
　
下晡佇家樂福踅甲黃昏時，轉來路裡看著夜市仔開始咧起鼓，阿勳講來去踅夜市.....！

踅夜市，彼已經是二十外年前的代誌。

彼時囡仔細漢，會共囡仔講：你這禮拜若有乖、咱拜六來去踅夜市仔。
三个人坐一台戰車（身障用改裝機車），參人chiⁿ來chiⁿ去【擠來擠去】，路無平閣細條，雖然真濟人看著阮這家伙仔，會細聲講：足幸福的呢。毋拘、嘛是有人嫌阮的車大台鎮位。

有一暗，阮像往過按呢，車騎到入口，煞予一个警察共阮閘落來，叫阮袂使共車騎入去.....！
車袂當騎入去，阮就無才調踅夜市仔嘍！
返頭轉來，囡仔講：我有乖呢！哪袂使踅夜市仔？
聽著心誠酸。真濟無奈的代誌，毋知欲怎解說予一个三、四歲的囡仔了解。自彼陣開始，我就罕呢閣去踅夜市仔矣。
　
今、厝裡有兩台快樂的馬車，夜市仔的路平閣闊；出入真方便，可惜囡仔已經大漢矣，佇他鄉拍拚伊的前途，袂當鬥陣踅夜市！

盈暗，享受一杯燒燒、芳芳的阿華田，貓咪像鼻著臭臊味遐歡喜，跳起來討欲啉。Khat【舀】一屑仔予啉，啉了閣討，貓仔啉阿華田，實在有夠古錐，佇貓仔的腦海中，這敢是一个芳甜的記持？

2015.09.19