 
字體：小 中 大 |
|
|
|
| 2015/10/25 10:12:42瀏覽71｜回應0｜推薦2 | |
|
倚晝歇睏的時，天色比尾暗仔時閣較暗。
機車騎出辦公大樓，才知慘。 真正是 [黑夜天白晝、黑夜又白晝....人生悲歡有幾何]..阮拄咧練的彼條歌-- 風透、雨大，視線誠bái【差】；頭前第3台車就看無啥有，路邊積水真懸，毋敢騎佇水裡的機車道，慢慢仔騎佇大台車的後面，真驚機車熄火，連擋青紅燈都毋敢共油門放掉。 雨中騎車，路特別長 共款的景，想起彼年 佇淡水上班，下班了後去學中文打字，佇教室內底，毋知影外口已經大雨落甲路面參淡水河平懸，想講厝裡的人等我食暗，嘛無料著有遐濟水會走起來大通路。 路行落去，就無才調返頭，返頭嘛毋知會當去佗位... 綴佇一台計程車後面，利用伊的車共水捒開，拄好有一條路我就緊行。 會記得小弟仔捌共我講，佇水裡油門毋通放，若無煙筒管入水，車就袂行.... 就按呢，提心吊膽轉來到厝，已經八點外，離厝裡食暗頓時間超過成點鐘。我看著規桌頂的菜，攏好好，無人食！ 小弟仔阿維講，伊下班看我猶未轉來，騎車欲去揣我，騎甲半路，人共擋，講路袂通，毋通閣騎落去。彼時無手機仔，我實在予厝裡的人真煩惱。 伊呀看我到厝，佇公媽前一直拜、一直拜，感謝公媽有保庇。 厝裡的人叫食飯，我行入去浴間仔換彼身軀澹去的衫仔。 衫焦矣、我的目睭煞澹澹。 予厝裡的人操煩，是我這世人的任務？！ 雨落，千年萬年不變，予父母惜命命的歲月，卻是liâm-mi【馬上】就變懷念的情景！ 2015.09.07
|
|
| ( 心情隨筆｜心靈 ) |
