旋律佇不知不覺當中，紀錄著生命的過程。

【哀愁的火車站】，是阮叔伯阿姐欲嫁的時，嫁妝kah一台足大台的rajio【收音機】，伊欲嫁進前，彼台rajio逐日攏咧唱【哀愁的火車站】..... 啊～哀愁火車站第二的月台
　
想無、喜事將近，汰會規工放這條歌？
電台主持人毋知阮叔伯阿姐欲嫁矣，所以逐工放送當流行的哀愁！

【昨夜夢醒時】是我拄去仁愛學校，想厝覕佇棉被內底哭，學姐佇宿舍咧唱這條歌.... 一夜裡夢來夢去無頭無尾　窗裡窗外淒淒黑
　
聽著歌聲，看著窗仔外的暗暝，想厝的我，哭閣較慘，學姐佇學校已經蹛兩年矣，一定袂記得拄入學校［新生］想厝的心情！佳哉保育老師郭老師真疼惜我，佇我想厝的時，安慰我真濟。

【野宴】是仁愛學校合唱團唱的歌，彼是一段無憂無愁，卻強說愁的歲月。
.... 大家高興一起歌唱，合著腳步邁進，到那邊快樂山上…..
　
彼个旋律，到今若唱起來，快樂就綴咧來！

【珍重再見】是仁愛學校畢業典禮唱的歌。
親愛的朋友離別就在眼前 從今以後 再相見前 我們會感到心酸。
　
阮學校的老師大部份攏真有愛心，畢業進前，捌聽老師佮老師咧會：若想著怹踏出這个校門，生活的障礙重重，我就足毋甘。
彼時阮猶誠天真，掠準外口是參學校共款，想講..老師真厚操。踏出仁愛學校了後，彼時真少有學校是有無障礙設施，佇外口讀冊，才深深體會老師替阮憂愁的心

【花香】是阿母過身了後無幾年，我才接觸的一首歌
故鄉彼條小巷　如今猶原　不同是阮返去伊無塊等，無人惜花叢　花哪會香。
　
昨昏我舉maiku【麥克風】定鎮唱著這首歌。同學講我唱這條歌袂哭，真易外。
這條歌無好學，自我聽著人咧唱，看著歌詞，深深觸動我的心，就開始認真學，騎車身邊無人，用情唱落去，定定唱甲心酸目屎流落來。兩三年來，已經練甲會曉予目屎莫流落來；若無...唱的人咧哭、聽的人嘛咧哭（誠歹聽，予人聽甲哭！）
　
昨昏參同學翁仔某佮幾个仔好朋友聚會、唱歌。
一首一首仁愛學校彼段歲月的歌曲唱出來，學校每一个角落的影像，出現佇腦海中。
　
阮是蹛學校的學生，做伙的時間真長，唱歌、學樂器是彼時真普遍的活動。
雖然蹛佇學校，但是流行歌仔學著真緊。便若放假，同學有人轉去厝裡，看著電視播新歌，阮就開始學。彼个年代歌星咧唱歌，咬字較分明，免看字幕，咱就會當明白伊咧唱啥。

阿勳點一首［又是黃昏］參同學唱
　
..我若像看著工藝教室內底彼台唱盤內底的唱片，［又是黃昏］彼搭刻著明顯的痕跡，因為這首好聽，每遍唱片唱了，就閣共唱針下唯這條的位置，捷聽，就聽甲深深一sûn【紋】的記號。幾何十年過去矣，唱片是誰的？一直重複聽歌的是誰？我已經袂記得矣，彼sûn，卻深深刻佇我心內，回憶伴著美麗的歌聲，予人懷念！
　
昨昏雖然無唱著【海韻】，但是我會記得，彼个歌聲是佇阮宿舍出口彼間教室，也就是昨日彼位同學佮阮阿勳怹的教室。滿滿的回憶，借著歌聲一項一項浮起來。

會記得濱漩花，是怹彼班的班歌。

點歌的冊內底，毋捌看過。佇網路嘛真少聽著這首歌
今仔日去揣….有人唱、但是攏無我欲挃的FU。 

同學
希望下一次再聚會，希望會當聽恁唱這首.....清唱也可以！！！

濱漩花
誰堪寂寞別離 含情相對依依 當再會的時候 花色也將褪了去
海的浪濤起伏 象徵著人生崎嶇 這悠長的歲月啊 何時呀才能重聚
勞燕分飛東西 願彼此常相憶