特別的經驗 - sann (33)翠苓台語文

字體：小中大

特別的經驗

2015/10/25 10:01:48瀏覽58｜回應0｜推薦1

你無看毋著，是啦。我抱的是狗仔！

自細漢，上驚的動物就是狗仔。

因為佇塗跤爬到七歲，族仔內的長輩，看我佇塗跤爬，為著欲鼓勵我徛起來行，半háⁿ【嚇】半鼓勵；徛起來行，若無狗仔掠作你是伊的朋友。

佇塗跤爬的歲月，狗仔確實將我當做朋友，定定行倚來我身軀邊，我總是驚甲放聲大哭。驚狗仔的心情，一直到大漢、到老，猶閣真驚。

騎車佇路裡，三不五時仔就會有狗仔走倚來吠。會記得上慘的一遍，是佇台北的時，唯厝裡到公司五、六公里的路程，無仝時間，予兩陣狗仔jiok【逐】甲走無路。予狗仔jiok，感覺足liông-pōe【落魄】、足無路用，又閣無伊法。
　
想講，這世人就是驚狗驚到底矣！
　
想袂到，厝裡飼貓仔了後，真少予路裡的狗共我吠矣，而且我內心嘛袂閣驚狗矣，這實在是足奇妙的轉變。
　
今仔日去朋友的舅仔怹兜，怹飼的這隻狗仔，像阮兜貓咪遐大隻，我竟然敢抱伊，而且袂驚。這…到底是啥原因？我實在想無。
　
感謝好朋友舅仔、妗仔熱情招待，予阮唱歌、食好料。這世人頭一遍抱狗的經驗，就佇遮自然來發生。
　
敢有可能有一工，我掠一隻狗仔來飼？
　
人生的代誌..chiâ【誰】會知影咧！

晚安！！！

( 心情隨筆｜心靈 )