以早牆圍仔無圍網仔的時，貓仔若綴出來走廊，著趕緊餳伊入來，驚伊跳出牆圍仔，阮無才調掠倒轉來。

從網仔圍好了後，每一日透早開門提報紙，貓咪就衝出來，跳起哩牆圍仔頂巡視。

貓咪雖然毋是囡仔，毋拘伊嘛有情緒哦

有時我恬恬咧看報紙，伊會跳起來唯手共我撥一下，彼就是欲討人佮伊耍。咱就愛共報紙下咧，參伊耍一睏矣，阮厝這隻敢會去飼著虎？（阮小弟仔講的），體力真好，愛耍、見耍耍袂煞。

有時阮咧食飯，伊會坐佇桌跤，用真sai-nai【撒嬌】的聲調...喵~喵~喵~….彼就是咧討食。聽講一般咱人咧食的食物，siuⁿ-kiâm【太鹹】毋好予食，若無伊的腰子會無好。會記得以早我細漢時，厝裡飼的貓仔，攏嘛是鹹湯攪攪咧，按呢飼貓，汰有啥物貓仔飼料？是講，人都按呢講矣，咱疼伊、就毋好做會傷害伊身體的代誌。

貓咪嘛有安靜的時陣，恬恬跔佇壁邊，毋知咧想啥？敢會是咧想伊的媽媽？

你看！貓咪看甲遐入神，是欣羨外口的開闊？抑是珍惜有遮風避雨溫暖的厝通徛？