施工中。 - sann (33)翠苓台語文

字體：小中大

施工中。

2015/10/25 09:44:13瀏覽31｜回應0｜推薦0

這一年來，南環路邊以早墓仔埔地整理起來，欲起造新都心，也就是新的都市中心；所以..樹仔、草仔剉的剉、薅的薅，用鐵phiánn圍起來，無青色的草仔通看，行過彼段路，心情像飛起來的坱埃「eng-ia塵埃」，碚碚無光。

頂仔彼粒風颱來，共鐵phiánn ián甲東倒西歪，一兩公里的路，鐵phiánn倒去的所在，用發生命案咧用彼種黃帶仔圍起來，愈看愈毋是滋味。

上班改行北環路，開始行無啥會慣習，這幾工愈行愈有味。路闊、車少，會使騎快車，雖然路程加出來成公里，顛倒較快到位。

經過斗六野球場，才雄雄想起，球場當咧起彼時陣，拄好囡仔佇虎尾溪遐一間學校咧讀冊，逐工著載囡仔唯遮過。看著柚仔園剷做平地，綠色的草埔變建地，誠袂慣勢。

今、成十年過去矣。球場邊仔的樹仔大欉矣，有綠色的建物，予人看起來心情輕鬆，壓力減輕！

早起輕輕鬆鬆行北環，遠遠看著十字路口停兩台白色的轎車，青燈、紅燈攏無欲駛行。騎倚一看才知影，原來是車禍。
兩台車主攏是女性，佇路中央兩人輕聲交談，姿勢優雅下一塊三角架仔，提醒經過的車輛細膩。無看著一般車禍現場有［戰場］的氣氛。敢是優美的環景予人動作優雅？

南環新都心的工程做好了後，綠色敢會閣倒轉來？
阮咧期待！

2015.08.19

( 心情隨筆｜心靈 )