我到這久猶想無，彼15分鐘是走對佗去？
早起有較早起床，攢攢咧欲出門的時，比平常時仔較早15分鐘。
想講時間閣早，關鐵門進前，隔著網仔門，閣參貓仔耍一時仔才出門。

機車騎到大通路，想講時間閣早，就斡【轉】去行農路，若無咧趕時間，我足袂愛行大通路，車呼呼叫、青紅燈捷捷有，行小路仔是予早早起床的家己的賞獎。

水田的稻仔拄播落去無幾工，青青青的稻仔參白白白的白鴒鷥，有十外隻赫呢濟，偉大的畫家敢畫會出來這款自然的媠？想欲將這个美景記入去頭殼內，機車放慢逗逗仔看。

欲出大通路的十字路口，草仔予這幾工厚厚的雨水沃甲躘真懸，坐佇機車頂頭等紅燈，順手共草仔辮頭鬃，予怹有媠媠的一工。

機車停好，想講...今仔日未8點就來到位，大概是頭一个到辦公室的。行入去大廳看著彼个時鐘，咦？汰會欲15分矣？時鐘閣害去矣hioh？出電梯行入辦公室，壁頂的時鐘是15分，同事大部份攏到位矣。

我到這久猶想無，彼15分鐘是走對佗去？

欲來睏矣，明仔載較早起來；沿路來去揣彼紡見的15分鐘！

2015.07.28