Tsang下晡（昨天下午）面冊的訊息，突然間跳出來國校仔一年仔同學的留言，講怹叔伯阿兄欲揣阮阿爸…..

雄雄，我煞毋知欲按怎回答。停一睏仔，我寫講：阮阿爸出國矣（天國）

同學講的阿兄，我知影；阮阿爸叫伊スケ。有時阮攏想無，阮兜真散，散甲鬼仔都毋敢來揣阮，毋拘，自我有記持以來，阮兜就有一台真空管的ラヂヲ【收音機】，阮阿爸講，彼就是スケ阿兄攢予伊的。

聽講彼台ラヂヲ是日本戰敗，主人轉去日本，無紮轉去hiat佇厝間，人去抾轉來，落尾才予阮阿爸提轉來聽的。

我人生第一个音樂記持，是スケ阿兄所賜。

彼台ラヂヲ會當聽著日本短波放送出來的節目，阿爸定定聽甲tsue̋-tsuè-tsuē【出神】，彼時我攏想無，日本送過來到遮的節目，品質誠差，像咧炒豆仔咧。阿爸汰會遐呢愛聽？

後來我知影，受日本教育的阿爸，佇ラヂヲ內底，消㪗伊的鄉愁。

我離開故鄉去外地蹛校讀冊的時，阮兜彼台ラヂヲ猶會唱歌。

後來厝裡搬去台北，稅厝徛起艱苦的日子，阿爸嘛是去買唱盤轉來聽，久久矣，買一塊曲盤轉來，大部份是日本的，阮聽無，毋拘旋律真迷人。阿爸嘛有買日本的戲劇，伊定定解說內容予阮聽，講彼是一人演出，內底卻是男女老幼的聲攏總有，彼時無認真記起來，即馬無地聽矣。

搬去蹛家己買的公寓了後，過年時仔，初一透早，足早的，阿爸會佇音響內底，囥一塊北管，放予大大聲，彼khiak！khiak！khiak！khiak ……！的鼓聲（敢是鼓？我臆的），就是欲甲阮叫精神。阿爸講，咱做田人，初一睏siuⁿ晏，田岸會崩去！彼時離做田的歲月，已經幾何年嘍呢！

平時仔上班的日子，阿母起床共早頓款好，替阮共便當攢好，就會共音響捘開，內底囥的曲盤，是日本輕鬆的歌曲，彼是欲叫阮起床上班的訊號；阿母一定毋知，音樂聽落到地，愈想欲鑽入去眠夢的世界。

同學一个欲揣阿爸的訊息，予我想起音樂佇阮厝裡，毋捌斷過的歲月。

爸母疼囝長流水、囝想爸母樹尾風。

今仔日；樹尾有風！