乖囡仔：

年底汝轉來參加兩場同學的婚宴，汝講：看看咧，結婚足費氣的！

我來講爸爸佮媽媽結婚的代誌予汝聽，彼、閣較費氣哦！毋拘咱都也行過來矣，嘛因為行入來婚姻路，所以二十外年前的今仔日，歡喜迎接一个古錐、乖巧的囡仔- - -就是汝。

爸爸佇國校仔6年的時，轉學來仁愛學校參媽媽仝班，國中上落尾一學期，媽媽去予學校編入去爸爸彼班，真複雜hoⁿ，其實還好啦！就是爸爸佮媽媽攏總有年半做同班同學，爸爸細漢的時，笑聲真好聽、笑容真好看，毋拘阮毋是彼陣仔就戀愛哦！

國中畢業了後，爸爸去學師仔、媽媽去讀職業商校。離開學校了後，阮兩人有咧寫批（彼个時代電話無普遍，嘛手機仔通用），雖然有咧寫批，嘛毋是寫情批哦，是寫寡生活上的代誌。像講：媽媽又閣失戀啦、生活當中有啥特別的感受啦等等。

有一年熱天，阮厝邊一个阿姨欲介紹一个查埔囡仔參我熟悉，彼時我的內心對爸爸有情份，可惜阮寫批攏毋捌講著互相的感覺，咱是查某囡仔，毋敢大面神先講合意對方。我就問阮阿爸，有人欲介紹，敢通去參人對看？阮阿爸建議我去看覓咧，無一定愛交往，予人知影咱有想欲嫁！

就按呢，我去參人相親。對方行動比媽媽較方便淡薄仔，聽講真gâu煮食，閣真愛看冊。人嘛生做袂bái。雖然按呢，我嘛是希望參我行人生路的人是爸爸。
毋知是上天有看著我的心願抑是按怎，真拄好，相親了後無偌久，爸爸透過阮的好朋友，就是恁臭生阿伯，共我講爸爸有意思欲參我行感情的路。
就按呢，爸爸媽媽才開始［談戀愛］哦！

當我認定爸爸是結婚對象的時；去相親彼个人煞拍電話來，講伊相親了工廠當咧搬徙，一直想欲揣我煞無時間，欲叫我出去約會。我共伊講：有閒來阮兜參阮阿爸泡茶啦！

敢講這就是人講的：欲捧誰人兜的飯碗，是註好好的？！
伊工廠若無搬厝、抑是爸爸若較慢表示咧……我可能就毋是汝的媽媽嘍！（好理佳哉呢！）

爸爸欲娶我做某，怹厝裡老母反對、老爸不管事。

恁內媽講欲替爸爸【進口】一个外國新娘，爸爸講無愛，因為外國新娘若走去，伊jiok袂著！
有一站仔我想欲勼跤（退縮），因為予人反對，感覺足歹勢的。
爸爸寫批共我講，伊佇［前線打戰］，叫我佇［後方］愛支持伊才著，兩个人的力量才會當解決困難啊！
伊講的嘛是有影！以早參人談戀愛，便若聽著對方家長有意見，我就放棄。

臭生阿伯知影阿媽會反對爸爸娶我，原因是我跤袂行，另工生囝袂曉家己tshuā（帶）囡仔。因為按呢，彼年過年我頭一遍來爸爸怹兜見未來的婆婆，臭生阿伯為著欲予阿媽看身障者嘛會曉家己育囡仔，彼陣仔逐个猶少年，經濟攏未穩定，所以無車通駛，怹唯台北騎機車載某佮囝（就是文淵哥哥）來予阿媽看，證明身障者帶囡仔毋是問題。
汝愛永遠會記得臭生阿伯為咱做的一切。伊雖然是我佮爸爸的同學，伊後來嘛變做恁外公真好的朋友，伊為咱做的，講袂了，先講甲遮。

因為阿媽無同意這層婚事，阮結婚的代誌，大部份是臭生阿伯替爸爸傱的。
爸爸也欲買厝、也欲娶某。錢項的欠缺佮時間的無夠，其中的困難毋是咱想會到的啦！我共伊講，咱先莫買厝，蹛佇原底遐就好。爸爸講我戇，老母都反對矣，蹛鬥陣敢會有好面色予咱看。
是啦！我有較戇，因為厝裡的人攏足疼- -我，我掠準所有身障者的家庭，攏是按呢疼惜弱者咧！原來並毋是按呢。

第二年年初，爸爸參汝內公來阮兜提親。了後，汝外公要求爸爸，愛請母舅來一- -tsuā【一趟】，這是爸爸上大的難題，因為伊自細漢毋捌去怹外媽兜，怹母舅生做啥款伊都毋捌。伊將這个難題誠懇共恁外公參詳，佳哉阿公無閣堅持這點；毋拘其他的禮數一定愛照步來。外公講，袂當因為我跤袂行，就予人感覺是凊彩嫁，所以；照禮來是阮阿爸的堅持！

訂婚的時，牲禮、聘金等等，li-li-khok-khok的代誌，恁內媽毋tshap【不管】，臭生阿伯替咱tshuân（準備）。牲禮雞、鴨、魚、肉菜市仔吩咐就有，聘金咧？彼時爸爸拄買厝，聘金是大數目。臭生阿伯做便媒人，來問外公，聘金敢會收？外公講伊頭前嫁3个查仔囝攏無收，毋拘人若看著錢，目睭會轉大蕊，會收、袂收無一定！

訂婚彼工，臭生阿伯共怹阿舅借16萬，捾來供佇阮兜公媽桌頂，訂婚儀式了後，臭生阿伯佮爸爸兩人離開的時，阿公袂記得共聘金提還怹。聽講怹兩人哪落樓梯哪煩惱，16萬呢，毋是小數目，這聲是欲佗提來還怹阿舅？送客了，阿公看著公媽桌頂彼疊錢，叫大舅舅緊jiok【追】落去樓跤提予怹。佳哉阮蹛4樓、佳哉怹兩人giâ枴仔【拿柺杖】行袂緊，錢提著才安心！

當爸爸決定娶我的時，怹媽媽看伊無才調阻擋這个婚姻，婚期欲倚的時，阿媽就走去台北二伯兜，無愛chhap爸爸。我的內心其實是歡喜的，因為新娘毋免看著大家，免去一份的壓力。
誰知！婚禮前一日，爸爸khà電話來講，阿媽欲轉來參加婚禮………..！

聽著這个消息，我彼下晡佇護膚店做面，店內底音樂輕柔、小姐講話細聲、手力勻勻仔捒。就是干單我的心臟跳足大聲。緊張啊、緊張！！

伴嫁的6个人內底，本來恁胖阿姨欲來，外公聽著這个消息，叫胖阿姨讓大舅舅來，交代講，若場面siuⁿ歹看，阿舅好出跤手。
每遍若想著這，我就感覺足對不起父母，嫁甲予怹遮爾袂放心。

唯台北到斗六，路途有較遠；本成爸爸問外公，敢通來斗六飯店予伊娶？阿公應講：我的查某囝，自然是唯我厝嫁出去，汝欲娶去佗，在汝！

欲嫁進前彼暗，阮阿爸提一疊錢欲予我，我無共提。我是上無替厝裡趁錢，閣開厝裡上濟錢的人，汰通閣提錢出來咧？！
想袂到欲出嫁彼早起，我佇房間化粧，聽著客廳阿公交代臭生阿伯：這汝共提過去！（是昨暝我無接收彼疊錢）

就按呢，當日透早七點捅仔出發，同學老張開新娘車、阮表兄載伴嫁- -的。車行佇高速公路，雨、像用倒的，落誠大。雖然序大人攏講［人到時就到］，毋拘總是希望佇看日仔予咱入房的時辰會當到位。天公伯有保庇，準時佇中晝11點外仔到厝。

一入門，大家【婆婆】坐佇客廳，彼个面若像咧等欠伊數的人咧！看著人客一个一个入來，就開始投講，爸爸偌無聽伊的話….等等。佳哉臭生阿伯會曉講好聽話安貼伊。其他的同學嘛真gâu呵咾，講：阿姆，恁共阮上巧的同學娶來做心婦呢…..等等！

　
逐个替阮共厝裡紮來的物件搬入門，臭生阿伯講伊橐【lak】袋仔內底的彼疊錢，紅包橐【 lok】仔已經破去矣，就共錢囥佇桌頂的謝籃仔。阿媽遮看、遐摸，掀開謝籃仔看著內底彼疊錢，內心應該有較歡喜吧。想講大概袂閣唸矣。
誰知去到宴客餐廳，阿媽又閣開始罵；這遍毋是罵爸爸，是罵爸爸的大兄。爸爸4个兄弟姐妹，無人來參加婚宴，這是怹的傳統，兄弟姐妹嫁娶無咧相thīn(互相理會)，毋拘阿媽嘛是有才調罵。阿公佇邊仔，無才調擋阿媽咧罵，臭生阿伯閣一遍共阿媽講請伊莫這時陣罵，食飽了私底下欲罵，臭生阿伯欲予罵。

結婚有費氣無？大概無人像汝的爸爸佮媽媽的婚禮遮費氣hoⁿ？！

　
閣較費氣的代誌，總會有過去的時陣。
無被祝福的婚姻，參婚姻會順利否；無關係！這是我為我的婚姻做的註解。

等甲結婚第3年，外公外媽、阿姨、阿舅佮臭生阿伯等等，佇台北馬偕迎接汝出世的時，所有的困難、所有的辛苦，攏化做內一陣一陣厚厚的喜悅！

有辛苦的過程，才會珍惜結果，敢毋是按呢咧？

乖囡仔；生日快樂！！！