將方向盤斡對我故鄉的方向- -田尾！ 

 
行到半路、看著最近佇網站真濟人去耍的［費茲洛公園］看板，就想欲入去看覓咧，這个有人供體伊叫做【肥豬肉公園】，生做啥款，原底叫溪洲公園，汰無愛用原有的名字咧，一看著知影地理位置佇佗位的好命，嘛袂bái聽，無重視本土文化，實在可惜！
　 
循路標綴人行，一入去就看著寫講停車位已經滿，愛坐【接駁車】；阮當然無遐骨力，坐【接駁車】對阮來講，彼是偌爾仔費氣的代誌啊。

駛甲公園附近，看著有人共車停甲對產業道路去，連私人的埕斗嘛寫一塊牌仔［停車100箍］、離公園較遠的牌仔寫［停車50箍］彼个景真趣味，想著故鄉有一塊厝地佮一坵宅仔，假日田尾公路公園的車，應該嘛袂少，轉來去寫一塊牌仔［停車100箍］，無一定會當加減趁- -寡。哈！！

順彼條路一直駛、一直駛。是啥所在？毋知！
離開公園，車行來到一个小小的加油站，阿勳報我看：無憂站！

無偌久來到十字路口；一爿去田尾、一爿二水田中。欲去佗？這時陣轉去田尾仔，時間有較晏，就踅對二水田中彼條路；轉來！

無憂站、無憂、讚！

 
攢暗頓【tshuân張羅晚餐】、洗碗收桌頂，［無憂讚］這三字，想著，就感覺誠趣味。忍不住想欲參汝分享：今仔日，無憂、讚！