2003年學寫台語文到今
定定會收著訂閱的台語雜誌
有時套冊出來閣買一下....
有時朋友出冊閣送一下.....
佮這兩年來學白話字的資料
毋甘掞掉
樓跤強欲予我的冊淹去矣

歇睏日
規下晡攏咧整理樓跤的冊
拍算搬起哩樓頂

暗頓食飽繼續整理
無時間看新聞

身軀洗好
真寒
一碗茴香仔煮麻油酒
捧來電腦前
哪食哪看網路新聞
：江蕙欲離開歌壇.... 

啊～
我叫一聲真大聲
咬著舌、提鏡來看；流血！

2015年時行離別ing？

昨昏台語會年度大會
兩位早日伴我讀台語的［知己］
攏缺席！

毋敢問怹為啥乜
愛學習家己面對
硬叫家己承認
人生本底就會愈行愈稀微

佳哉有台語冊一堆
樓頂、成做此後我hân-hā（閒暇）的天地！

新年平安、我所有朋友！

2015.01.02