透早六點外仔，聽著伊佇灶跤食早頓的聲，反一下身，我繼續睏；七點外聽著伊開門發車，車駛遠去的聲，反一下身，我繼續睏。
連歇三工，定著欲共最近定失去的眠，補甲夠。
　
八點外壁頂的siān-âng-á【壁虎】tiak8- tiak8 -tiak8，連續三聲大大聲，共我唯無夢的睏眠叫精神，伊是嫉妒我睏甲遮呢沉？
起床、無塞鼻、無頭疼。哪會有遮好空的chăi-i時【早晨】？是昨暝睏前彼杯酒的關係？上好是。按呢我逐暝啉酒就有理由。
　
九點外，外口的日頭光映映，hiannh兩領被單落去洗。續落焚茶、泡一杯咖啡提報紙配早頓。
報紙若會當莫看，規工攏是好心情。
　
唉！自由的頭版，就是欲予我咖啡啉著驚驚、早頓食著tah-hiannh【搭嚇】…..佳哉閣有頂日仔買的義美杏仁茶通硩驚。
　
十點外，攢煮晝。
順續揀幾條仔演歌來聽。
演歌的旋律，總會tshuā我【帶我】倒轉去有父母的歲月。
想起每一遍轉去外家，老大人總是煮這煮彼，煮甲桌頂排袂落。
共怹講，買幾項仔來食就好矣！
　
這馬我嘛做阿娘，怹的心情我知影；外口的物仔，予囡仔食著我心驚驚。足想欲每一頓攏阿娘家己來攢予食；可惜囡仔無佇蹛遮。
　
倚晝，去一tsuā【一趟】市內。菜市仔hui-hui-leh【逛一逛】，煞毋知欲買啥。若像規菜市仔攏貼著［頂新］這个名。
買一包［小黃瓜］轉來家己做脆瓜仔。厝裡做脆瓜仔的料；豆油、酸醋佮二砂，攏毋是味全的；略略仔安心。是講，嘛毋知會當安心外久？聽講閣有一粒大大粒的未爆彈…..
　
唯菜市仔轉來，斡唯一條少人行的小路仔，路邊的草定定強欲共路掩掉，才有人來剷；最近拄剷過草，路行起來加真大條。以早行這條路，是欲看路邊的草木、佮聽樹頂的鳥仔聲。最近知影路邊彼條溪仔有魚，車騎慢慢，溪底的魚咧泅真好看。行過一、二十年，最近才知影溪仔有魚，會知影溪仔有魚，是因為一个黃昏下班時，經過遐，看著一个外籍查仔人佇溪邊，大力摔一个物件唯塗跤，共看、啊！是猶咧活的魚。才知這條溪仔有魚。
即馬逐遍唯遐過，攏會共溪底的魚仔講：人若來，愛覕予好勢，若無就會變做人兜盤仔底的好食物。
　
車騎轉來到厝前，舉頭看二樓頂。遐的花若像咧共我討欲啉茶。
徛佇花台前，看著風船葛【倒地鈴】。這是囡仔頂遍轉來，來沃花的時，發現伊細漢時種的風船葛攏無去矣。問我、我嘛毋知當時無去的。
載伊去車頭，倒轉來的路邊，挽幾粒仔轉來種。
　
今、已經開花結籽。