2020.04.18

查仔人的灶跤ga-su爐（瓦斯爐）永遠欠一个鍋仔。

就若像房間衫仔櫥永遠欠一軀媠衫仝款。

聽講鑄鐵鍋袂bái用，想起細漢時灶跤彼kha烏烏的鍋仔，穩穩在在坐佇灶仔頂頭，煮出來芳閣好食的三頓，飼阮這陣猴囡仔大漢。
真久就數想我的灶跤嘛有一kha烏烏的鍋仔來鎮殿。
　
頂工聽同事講小7有咧賣鑄鐵鍋，去預訂一个。
昨下晡下班去領。
小7門口拄好有店員咧貼廣告，我共領貨的單交予伊，麻煩伊替提共鍋仔。
看伊對內底moh（抱）出來，若像真重。
伊共鍋仔囥佇我oo-to-bái跤踏仔，叮嚀講：真重！轉去厝裡愛叫人幫你提哦。
　
真重？這是我咧織夢的時一點仔都無去想著的代誌。這个鍋仔，若逐遍攏著叫人替咱提，按呢我欲按怎用伊來煮食？
半路用手搝看咧。有影誠重！
　
今仔日開來用。
哪煮哪想，頂站仔才共囡仔講，當初買彼套重khôaⁿ-khôaⁿ的安麗鍋，若有咧煮，叫伊提去用，我欲買較輕的鼎來煮。

糊塗的我，煞去買著閣較重的鍋仔。
佳哉重量予蓋佮鍋仔身兩个分擔，一鍋芳芳芳的滷味完成矣！
　
煮著誠快樂！