 
字體：小 中 大 |
|
|
|
| 2022/06/21 11:15:30瀏覽262｜回應1｜推薦10 | |
| 202０.03.30寫 禮拜手搖車搖入去大埤鄉。
去大埤踅一liàn足大liàn，予我見識［大］埤的大。
其中有去一个19年前六房媽紅壇的所在，內底展示用稻草做的藝術品，有龍、有蛇等等。
彼尾蛇真長，介紹的人講蛇是用稻草辮的，像查囡仔咧辮長頭毛彼種方式，辮起來的草索仔是扁的，著家己做，參外口咧賣是圓的無仝。
自頭辮到尾『一氣呵成』，一尾蛇、一尾龍的完成，時間單位用［個月］計算的，是一項真厚工的藝術品。
佇遮看著寫［五穀糶、糴］的字。
真久無聽人講。予我對糶佮糴這兩字，nǹg入去糶粟仔、糴米的記持。
糴米是為著煮三頓，啊若是厝裡錢無夠用，著去糶粟仔換錢，是一層無奈的代誌。
佇我記持內底，阿爸帶領的割稻仔班，會對田裡擔粟擔轉來倒佇門口埕，厝邊隔壁查仔人相放伴，有時人替咱，有時咱替人，門口埕的粟仔，三不五時就有人舉粟耙píng粟仔，予日頭曝予齊勻才交予米絞車轉去囥。
若好天，就較緊ta，若歹天，就愛煩惱粟堆的粟仔，毋知會翕甲發芽否，做田人，對稻仔播落去一直到收成，無一工毋是看天咧食飯。
粟仔曝ta了後，搬風鼓出來，用風鼓鼓粟仔。
古早人實在真巧，發明風鼓這个物件。風一鼓，實腹的粟仔代先落落來風鼓腹肚邊的塗跤、冇粟仔飛對風鼓尾出來。
細漢時真愛佇風鼓尾承風，風內底有芳芳的粟仔味。毋拘阿母攏講坱著粟坱身軀會chhiah -ia̍h，叫阮袂使佇遐耍。
鼓好的粟仔，一袋仔一袋裝好了後，會請米絞來載去。
欲載去進前，怹會舉一支若像布袋針，鑿入去布袋內底，抽幾粒仔粟仔，用喙咬看有夠ta否，若無過關，著倒出來閣再曝。是講這款情形我猶毋捌拄過，因為阮阿爸雖然是做田的，伊有讀過初農，對農事攏真用心研究，這招咬粟仔試濕度伊嘛會曉，所以猶毋捌hông退回。
粟仔載轉去米絞囥，就若像咱這馬咱共錢寄郵局、銀行仝款。
寄佇銀行的錢毋是領袂了。寄佇米絞的粟仔嘛仝款，捷糶，粟倉嘛會空。
阿姐定定講一層往事
伊講有一遍阿娘叫伊去米絞糴米轉來煮。
米絞的頭家阮叫踐伯，伊共阮阿姐講：恁兜的粟仔攏糶了，無粟仔通絞米矣。
阿姐捾一kha空空的米袋仔轉來，不忍心共阿娘講踐伯講咱無粟仔通絞米矣，干但哭。阿娘講：叫妳去糴一下仔米就咧哭，是哭按怎？
米甕空空，等無米通落鼎，無講嘛袂使得....
彼站仔，阮阿娘定定銅鼎仔捧咧，去共厝邊隔壁借米轉來煮。
家己對米絞絞轉來的米，就已經儉儉仔食，參蕃薯chhiam落下煮較有額。借來的米免講著閣較儉。阿娘講以早大姐蕃chhiam飯食甲哭。我相信！彼時我嘛感覺大人足奇怪，稻仔、蕃薯家己田裡攏有種，是按怎著愛食歹食的蕃chhiam飯，無，煮一个仔蕃薯箍飯嘛較好食。
佳哉大人無像阮淺想，蕃薯大出的時，礤簽曝做脯，一年迵天攏通好食，講這就是好天著積雨來糧。
［清米白飯］佇彼當時，只是一个遙遠的名詞，阮真少食會著。
天災來的時，天若將農作物收轉去，彼个年代無時行農損補助，幾分仔地，飼袂起頭喙濟濟的一家。阿爸只好離開伊心愛的塗地，去北部揣空課。尾矣，阮嘛成做異鄉的人客。
參加愛無礙的雲林走讀，予我有機會行入去時間的磅空，抾轉來強欲袂記得，有甜甜、嘛有酸酸的過去。
＊＊
一liàn=一圈
nǹg =鑽
píng=翻
ta=乾
chhiah-ia̍h=刺癢
hông=被
chhiam=切細曬乾
|
|
| ( 心情隨筆｜心靈 ) |
