 
字體：小 中 大 |
|
|
|
| 2022/06/21 10:54:40瀏覽120｜回應1｜推薦4 | |
|
2020.03.08寫 綴（跟隨）愛無礙協會出去ká車。
協會tshuā阮去的景，攏經過用心揀選。
予阮耍甲真忝嘛甘願。
看著規塗跤的落花，已經不忍心呵咾樹頂花蕊的媠
春天ká車，一路花開看袂煞。
苦楝仔花恬恬媠，毋知會欣羨斑芝花（木棉花）影目餳人（吸引人）否。
車隊入去崙背錦鯉養飼場，本成是欲入去看魚仔
毋拘我一尾魚仔都無看著，因為攏咧看路。
阮的車仔行佇內底，路的闊度車仔行著it-pái it-pái（都都仔好），若無注意，就會去khê著。對飼魚場出來，沐一車輪的魚仔水爾爾。
趁怹閣咧內底看，我去附近四界踅。
看著一欉大大欉的苦楝仔。
著！彼就是我細漢咧耍的苦楝樹跤。
樹仔拄天懸，阮的眼界無到遐，所以毋知影苦楝樹會開花。
一直到來雲林，看著一種細欉樹仔開茄仔色的花，媠ka̍h。問人彼是啥？講是苦楝仔花。
我愣佇遐，想講陪伴我細漢時的苦楝樹，伊看阮灌肚猴、看阮耍露螺、看阮扮公伙仔…..伊原來嘛會開遮媠的花！彼陣伊毋知有笑阮是一个戇囡仔否。
我記持內底，伊是一欉會生袂使食麥芽膏的樹仔，伊是一欉本成就應該佇遐的樹仔、伊是一欉毋好去予雞仔、鴨仔食著，有毒的樹仔。佇我看著苦楝樹花進前，佇我頭殼內底，美麗兩字一直參伊無關係。
原來伊嘛有細漢時、原來伊嘛有美麗清芳的花蕊！伊的落花，無聲無說，無像斑芝花，媠甲會講話。
離頂一斗ká車，已經有四、五個月矣。
久無振動的筋肉，真忝！出門𨑨迌，忝甲真歡喜。
感謝愛無礙工作人員，阮出去耍一工，怹毋知著辛苦幾日來籌備
花開紅紅
媠噹噹
時過落塗
會驚人
斑芝花
來～去紅塵
若眠夢
儂今葬花人笑痴
他日葬儂知是誰 突然間想著林黛玉
|
|
| ( 心情隨筆｜心靈 ) |
