2020.02.23寫

厝邊阿桑問我：恁樓頂種彼是啥乜花，媠甲！
舉頭看，有影媠tō著！

逐工出門上班攏咧趕時間、下班入門天色已經暗，無咧注意恬恬仔媠的花蕊。

這是啥花？其實我嘛毋知。
是佗來的？
會記得若像囡仔國校仔一、二年仔的時，怹老師介紹落地生根，提一、兩葉轉來種佇花khaⁿ仔（花盆）。一葉變一欉、一欉落葉變一簇、一簇湠開就滿滿是。無啥咧予食水，伊就是會活。

厝頂天溝已經發甲無水路。
我咧唸講：等囡仔轉來才叫伊起哩清清咧。
阿桑講：嘛免啦，水都會流落來就好矣。

天溝變花園，嘛是一種好景色。
好！按呢就予水家己去揣出路。

只是，厝頂著較堅強咧，毋通崩落來嘿！