 
字體：小 中 大 |
|
|
|
| 2014/08/17 22:02:57瀏覽188｜回應0｜推薦12 | |
| 又閣等著一個月一遍的台語文讀月會嘍！真歡喜。 今仔日是媠姑娘楊老師主講 題目：台灣歌謠的美麗佮哀愁 楊老師以早是替布袋戲寫劇本的作家 現此時是教國校仔台語的老師 腹內全全字 伊攢的資料我真合意。 其中梁啟超先生寫的台灣竹枝詞 內底「 綠蔭蔭處打檳榔，蘸得荖醬持勸郎；. 願郎到口莫嫌澀，個中甘苦郎細嘗！」予我想起阮故鄉彼个叔伯小弟阿華 阮三姆過身時，阿華才五、六歲仔爾，無老母的囡仔，佳哉有真濟个阿姊共疼惜。疼伊的阿姊當中，素姐上好性地，溫純閣骨力。像怹阿母按呢咧hōaⁿ家。 毋拘查仔囡仔，年歲到總是愛嫁人。 媒人來報、對方來提親、對方來訂親….. 欲嫁的時日定著的時， 阿華來阮厝裡揣怹屘嬸（阮阿母）講話。 伊問講：「屘嬸，咱敢會使講無愛嫁？」 阮阿母應伊：「戇囡仔、食人檳榔餅，就是人的囝。咱哪會使講阿姐無愛嫁咧！」 厝邊隔壁逐个歡喜咧食大餅，阿華心肝底的稀微敢有人知影！ 每擺想起，總會替伊心酸。 是講 時間咧過真緊 後來伊事業做佇外鄉 真久無看著阿華矣 無一定人伊即馬做阿公咧？！ 2014.08.17 |
|
| ( 心情隨筆｜心靈 ) |
