2020.02.13

我確定，這毋是夢！
　
昨下晡下班斡去市內買安全帽仔。
印象中若像民生路有一間。
著、就是這間，nǹg過大路到店口
順利買著一頂安全帽仔。
　
除了新型的鈕仔較袂慣勢，舞規晡才鬥好勢
戴起來感覺真合軀（合頭），閣是我合意的色水，袂䆀。
　
離開店頭無偌遠就是青紅燈。
倒斡著閃車，想講正斡才來揣路。
　
正斡了後一直行，感覺足奇怪
這條路的招牌、景緻攏足熟悉
毋拘
中華影城，哪會走去倒爿？
福興宮，哪會徙來正爿？
一定行毋著去矣，毋拘是佗位毋著？
行看咧，若有巷仔才來斡
　
閣行....
慈濟....大輪仔機車行
舉頭看著彼座陸橋
啊！附近是我上班的所在啦
轉去的路著踅180°
方向hut毋著去矣
　
路痴症頭發作
這遍算真緊發現
頂年仔佇北環路欲斡市內
斡毋著爿
嘛是感覺路景誠熟悉
只是所有的招牌攏tshāi（立）毋著爿
一直行到囡仔讀過的學校
彼箍搭仔五、六年來若咧行灶跤
才雄雄精神，緊騎返頭