2020.02.02

純白的雲、清氣的天
日頭燒燒，雞啼的聲對遠遠的所在傳過來
順雞咧啼的聲，神魂倒轉去細漢時的歲月。
鳥隻飛懸飛低咧唱歌。
提一本冊，佇溪仔邊享受假日的清閒
　
身軀邊傳來慢慢的跤步聲
蹛巷仔底的阿桑
Thuh一枝枴仔
徙著伊無蓋方便的跤步
哪行倚哪問….妳咧看冊哦？過年囡仔敢有轉來？ah無愛叫伊娶娶咧。
等伊問了
我講：這馬的囡仔有怹家己的主張，咱順其自然就好。
　
伊講：講罔講，新婦hoⁿ，娶著好的就好啦，若是娶著勥跤的……………..
然後，溪仔邊變成我足想欲逃走的所在。