2020.01.21

阮細漢的時，參厝邊隔壁的囡仔 ī 扮公伙仔，燈籃仔花葉就是阮的錢。用青色的做1箍、黃去的葉仔是5箍。

佇圍籬的竹跤抾破碗皮仔做碗、做盤仔。
彼个年代厝內的塗跤是［塗］，無khōng紅毛塗，一般碗盤仔罕呢破去，辦公伙仔欲用的碗盤仔真缺，有時陣會去挽較大phiò的樹仔葉來貯煮好的食物。
凡若捌看過大人做啥，囡仔就會學。
做爸爸的著出去趁錢，做媽媽的佇厝內煮飯。
囡仔伴毋捌予我做媽媽，因為彼个年代無媽媽是跛跤的，所以我攏會當做厝內的囡仔爾。
　
我濟阮小弟仔四、五歲，伊細漢的時足古錐。
一遍看伊倚佇阮阿娘身軀sai-nai講：伊呀，我大漢了欲趁錢予妳。
伊呀問伊：欲趁啥錢？
應講：燈籃仔花葉！
彼陣伊是認真的。因為扮公伙仔攏按呢趁錢。
我想，彼時陣阮阿娘的歡喜，嘛是真的；雖然伊知影燈籃仔花葉袂做得錢。