2019.12.18

　
禮拜趁天氣燒烙，騎車去揣小妹仔。我佮小妹仔攏蹛台3線。
來回騎百捅キロ（kiro 公里），照講應該誠忝，彼暝煞睏袂去，羊仔予我趕去跳過溝，看起來已經跳甲比我較忝，莫數想欲掠羊仔換愛睏神的收留。
我這个小妹仔，從細漢恬恬仔讓我、陪伴我、恬恬仔大漢，到這馬，恬恬食三碗公半。
　
阮阿娘生我這个小妹仔的時，是我跤拄袂行彼幾年，無論是傱病院、無論是佇厝裡，阿娘尻脊骿不管時偝的，攏是我。阮小妹仔囥佇房間眠床頂，真乖，無啥會吵人。
有一日蹛後壁lo̍h的厝邊，行過阮房間邊仔巷路，聽著嬰仔的哭聲，問阮阿娘：咧哭的是tsiâ？
阿娘講tō上細漢的查仔囝(彼陣仔小弟仔猶未出世)。
原來伊叫是阮阿娘偝的我，就是上細漢的。
這是我猶無記持，後來聽阿娘講起的代誌。
　
我對小妹仔頭一層記持，應該是有一暗半暝仔，我像往過定定哭按呢，哭袂煞。
小妹仔佮我睏仝床，眠眠仔講：伊呀！三姐仔足吵的。
伊呀應伊：三姐仔身體無四序，人tshiah-ia̍h，妳乖、緊睏honn！
我聽著遮的話，內心有歹勢。其實嘛無啥乜tshiah-ia̍h，只是歹睏癖，luî-tui起無khiang，烏白吵人爾。後來我有較乖抑無，我毋知影。應該是無，因為個性牢入骨，用刀削袂lut。一世人gâu吵！
　
小妹仔ná來ná大漢，後來二姐仔去讀冊，小妹仔就變成我的伴。
我脾氣真pháinn，足愛欺負伊。
會記得有一遍，兩人坐佇眠床道。手裡毋知對佗sa來的一支ペンチ（penchi=鐵鉗），看伊白白肥肥的跤腿肉，共問講：我共妳ngeh看覓，好否？
伊戇戇應好。
我就共ngeh落下。伊煞哭出來。
我講是妳講好的，袂使哭。
伊會疼，當然嘛是閣再哭。
彼陣仔厝裡無大人佇咧，哭煞我共伊講：袂使投哦！
伊真聽話，大人對田裡轉來，伊無講起我的hîng-gi̍k。做歹予人am-khàm起來，其實嘛毋是啥乜好代誌，因為無警覺，會生湠閣較歹的行為。
　
我七歲彼年，阿爸取兩支竹箍做枴仔予我學行。
我干但對塗跤peh起來徛咧，就學足久的。開始徙步學行，跋倒更加是四常的代誌。
跋倒會疼，我跋甲khí-phuì-bīn，定定共枴仔擲入去眠床跤，嘛毋知有幾擺，攏是小妹仔nǹg入去抾出來，提予我叫我閣再行。
我有一擺無耐心，用枴仔共拍。伊疼甲大聲哭。
彼个時陣欲倚晝，我知影伊呀得欲轉來煮飯矣。
枴仔擲咧，用爬的去後壁埕覕起來，順紲看囡仔tshit-thô。
　
無偌久，叔伯小弟來叫我：恁伊呀叫妳轉去。
我才無咧戇，這陣轉去一定hông 摃。
我無隨轉去，煞參人耍甲袂記得咧。
過誠久，另外一个厝邊的囡仔來後壁埕揣我講：恁阿媽來，有買甘蔗，叫妳轉去食。
我耍甲悾去，袂記得用枴仔拍小妹仔的代誌，叫是阿媽來是真的。下性命爬轉去欲食甘蔗。
轉到厝才知死！無阿媽、無甘蔗，伊呀舉一支sàu-se-gím-á佇門口聽候我。
　
伊呀用sàu-se-gím-á sut我，共我講：枴仔是欲予你行路，毋是欲予你kâng拍。今仔日你拍的是家己的小妹仔，後擺若去拍著別人，我是欲按怎佮人pué-huē。
自彼遍了後，我毋捌閣用枴仔拍任何一个人矣。
　　
我入學年歲到矣。收著冊單的時有夠歡喜，我欲去讀冊！
阿爸講：等恁小妹才同齊去讀。
　
我毋知哭掉幾張冊單，阿爸講：是為妳好，才予妳等小妹仔。
彼時我無感覺阿爸是為我好！
　
讀冊了後，阿爸干但買一个冊揹仔，我佮小妹仔的冊囥做伙，冊揹仔予小妹仔揹。
我足想欲有家己的冊揹仔，囥家己的物件，其實彼个年代，除了冊佮鉛筆盒仔，嘛無其他的物件。
我考試著第1名。共阿爸講我第1名，敢會使予我一个冊揹仔？
阿爸講：予恁小妹仔揹冊揹仔，是為妳好呢，妳gām-gām！
　
彼時我無感覺阿爸是為我好！
　
叔伯阿兄聽著講：妳比人較濟歲，毋讀第1名，無是欲考幾名？
其實小妹仔成績嘛真好，我個性較hòng、伊較細膩，第1名定定是伊的。
　
個性袂愛參人計較，恬恬仔過伊的日子的小妹仔。
結婚了，生三个後生。好命甲。
囡仔離跤手了後，伊就參加讀冊會，閣佇梅川文化學會參漢學吳耀贇大師學漢詩吟唱等等。
這馬囡仔大漢矣。參翁婿過著退休的日子。
　
我上佩服伊的是…竟然有法渡將郵局退休的翁婿，搝入去伊的漢詩團體。翁行某綴，佇漢詩研讀這个領域，兩翁仔某攏有真好的成績。
　
我記持愈來愈bái，最近發生的代誌記無啥會起來，毋拘以早參小妹仔的代誌，攏會記得。
　
想遮濟，愛睏神若像猶閣無欲收留我，只好等天光，無欲按怎？
　
＊＊
忝=累
傱=跑
尻脊骿=背部
後壁lo̍h=座落
是tsiâ=是誰
tō上細漢=就最小的
tshiah-ia̍h=刺疫(不舒服)
luî-tui=無端鬧脾氣
pháinn=壞
sa=捎=隨手拿到
ngeh=夾
hîng-gi̍k=橫逆
am-khàm=掩崁
peh起來=爬起來
khí-phuì-bīn=翻臉
擲入去=丟進去
nǹg=鑽
tshit-thô=玩耍
hông 摃=被打
sàu-se-gím-á=掃梳笒仔=細竹枝
sut=捽 抽打
kâng拍=共人拍
pué-huē=說明
gām-gām=笨笨
較hòng=散仙散仙
bái=不好