 
字體：小 中 大 |
|
|
|
| 2020/05/14 15:02:14瀏覽160｜回應0｜推薦0 | |
2019.12.10 我毋知影有偌濟人看著尾暗仔日頭落山的時，是毋是攏有一種思鄉的情懷。
頂工參厝邊太太開講，國中畢業去蹛工廠，伊講夭壽哦，若看著日頭落山，就覕咧哭。 我國校仔4年離開故鄉去和美讀冊，日時參人耍甲足歡喜，若看著西爿彼粒紅紅的日頭，袂直….嘛是覕入去棉被內底流目屎。 大漢了後，參厝裡的人講起這个心情 阿爸講，彼是人的本性。 阿爸去二林讀初農，彼時陣蹛學舍。伊講黃昏一到，心肝就真艱苦。 阿母笑笑講，伊做查仔囡仔的時，參人去蹛鳳梨會社，後來因為擋袂牢尾暗仔想厝的艱苦，就無蹛，甘願轉去做田。 阮囝細漢的時，厝裡穡頭若濟，做袂去，尤其佇過年的時，阿爸會來共怹孫tshuā轉去台北照顧。 有時仔阿媽會予伊這个孫打電話轉來斗六，參爸爸媽媽講一下仔話。 電話講了猶未切掉，囡仔會提予阿媽，伊無想欲掛電話。阿媽問伊是按怎。應講：毋知按怎，看著太陽下山，我就想欲哭。 西爿的日頭拄落海，想著遮个代誌。 ＊ ＊ 偌濟人=多少人 尾暗仔=黃昏 厝邊=鄰居 蹛工廠=住工廠 覕咧哭=躲起來哭 西爿=西邊 袂直=沒完沒了 擋袂牢=無法忍受 穡頭=工作 tshuā轉=帶回去 |
|
| ( 心情隨筆｜心靈 ) |
