其實這兩座潭相倚近，一日欲耍了並無困難。
困難的是，用手ká的車仔，爬崎真食力、落崎擋仔擋甲手強欲出汁。

倚晝去南恩禪寺拜濟公活佛，寺裡的濟公真特殊，掛烏仁目鏡。聽講因為西照日的日頭，鑿著濟公的目睭，所以就共伊掛一副遮日頭用的目鏡。有夠趣味。

中晝佇南恩禪寺食畫，廟裡攢的菜有夠濟，濟甲予阮食袂了。
食飯的時，有人挾茄仔起來配飯，嘴裡講：ㄑㄩㄝˊ子吃ㄑㄧㄝˊ子。
我本來聽無伊咧唸啥，後來才知伊講：瘸子吃茄子
哈…..佇遮食飯的阮這陣人，大部份是行路無方便的，華語講號做『瘸子』啦！
提家己的疼來滾耍笑，我合意！！

我真愛耍手搖車，尤其是去有山、有水的所在，參大自然直接接觸。
掠掉起崎落崎的全心ká車，平路的時就是享受的時陣。，輕輕吹過來的風，心情綴咧飛。哪ká車，哪唱歌，唱予路邊的樹木花草聽。

樹葉仔落落來的聲，落花牢佇身軀的感動
總是予我想起少年時愛讀的彼首席慕容的詩
『如何讓你遇見我，在我最美麗的時刻，為這，我已在佛前求了五百年』

感謝愛無礙協會用心，予我的人生寫入來一頁無可能的紀錄- - 一日雙潭。
雖然毋是蓋困難，但是若毋是有人tshuā，閣較簡單的行程，我嘛袂曉行來遮。

又閣酸、又閣忝。
內心歡喜滿滿的假期，結束嘍！！
晚安。

* * *
ká車=搖車
有人tshuā=有人帶