頂日仔家己騎車去揣東螺溪的台灣欒樹
揣無著。
予我發現一條叫做莿桐埤圳。
去網路地圖看
長長長
對東爿的二水到西爿的二林

今仔日對林內去二水行莿桐埤圳
請孤狗報路，閣毋敢完全信任
捌聽講孤狗會共人tshuā去深山林內
所以家己假gâu，就加行一寡仔路

無要緊，路加行，風景就加減看
上驚的是聽著狗仔聲
　
彎彎斡斡，行真久
踅甲尾矣看著田尾國中
我若無去仁愛學校讀，國中應該嘛是讀這間
頂年仔捌佇遮參加國校仔的同窗會
閣再行，往大通路
原來我的母校- -田尾國校就佇遮
正斡往北- -是我的故鄉
倒斡往南- -是我的狗仔岫
　
看看咧，時間無早
若轉去祖厝，遐猶蹛兩个叔伯阿嫂
時間算算咧，若轉去，干但會當叫怹一聲：阿嫂！
就愛隨返頭矣
　
一个阿嫂蹛較南爿的正身
一个阿嫂蹛較西北爿，另外一簇厝，怹較早蹛阮對面。
後來怹共竹管仔厝後壁的一棟磚仔厝，徙去較西爿
彼陣仔咧徙厝無用機械，全部是人工
厝下面tsū柴箍，一屑仔一屑仔共厝liàn徙位
邊仔咧看是真鬧熱，咧徙的人喝甲規身汗

兩个阿嫂出入無仝大門
我若干但去看一个
另工就會hông問講：niá嫂講頂工妳有轉來，都無來我遮！

niá嫂…就是恁阿嫂
細漢時阮阿嫂會講：niá爸轉來矣。niá伊呀咧揣妳…..
這種講法除了故鄉的人，其他所在我猶毋捌聽過。
故鄉的腔口，使人懷念！！

＊＊
油加tīnn=油加滿
tshuā=帶
假gâu=假會
tsū柴箍=墊木頭
liàn徙位=滾動移位
hông問=被問