手搖車的人員分做4組，每一組陪騎的志工佮工作人員攏總成十个，日農的太太嘛騎鐵馬仔一直伴佇阮這隊照顧阮。

日農是手搖車的勇將，南北二路、山頂海邊，看伊面冊的相片，非常精彩。
開始起行我才知，阮這組（Ｂ組）我唯一無熟悉的，是一个多重障礙的身障者，目睭無好、反應較慢。由經驗豐富日農騎頭前引導伊，阿勳綴邊仔提醒伊，閃路邊的障礙物，緊搖綴予倚…等等。
我是Ｂ組上輕鬆的隊員，押尾對怹逗逗仔行。
Ｂ組搖到尾矣，煞變D組。因為配合每一个組員的動作，速度無法度衝緊，後面的人一隊仔一隊超過阮。起初我無耐心，足想欲衝、衝、衝！後來看勇跤的日農都遐有耐心，寬寬仔tshuā、慢慢仔行，我這个滷肉跤是咧急啥貨。
　
對斗南田徑場出發無偌久，同濟騎車的長愛育幼院一个囡仔，滴滴漢仔爾，應該是六、七歲仔，毋知為著啥代誌佇咧哭。聽著怹的師長咧共講：出外，啥物狀況攏會拄著，人生欲行的路，敢有可能攏是平坦的？彼个囡仔毋知聽有否？我聽有，所以對續落來的路況，是上崎、是落崎，是好天、是歹天，閣較有面對的拍算。
　
中晝佇嘉義南靖糖廠歇睏食晝。出發進前擔心的風颱雨，到這馬都抑落一、兩陣爾，雨神真緊就將雨收煞。若無，穿雨幔搖手搖車，誠食力，內面的衫往往參雨幔的雨水平仔澹。
　
對南靖糖廠出發到佇柳營的江南渡假村，開始是平路，得欲到位的時，袂少起起落落的路段，有一个特別崎，落崎輕鬆、上崎困難。明仔載回程，敢有才調上這个崎？
　
歇睏矣，倒佇眠床，今仔日行過的路，攏走來腦海中踅一遍。
　
報名欲參加活動的時，單程60公里左右，來回百外公里，毋捌搖遮遠，本成是想欲偷食步，騎機車綴人罔tshit-thô就好。七月初參加對斗南到林內的手搖車活動，感覺若像毋是蓋困難，就改變想法，斗南到台南，咱就來挑戰看覓咧。
雖然決定挑戰，其實無信心，做上bái的拍算。有可能半路騎袂振動；按呢就面皮激予厚厚，坐補給車。有可能第二工痠疼甲無才調閣騎，上強的止疼劑紮咧。佳哉一路平安，到甲倒佇眠床的這時陣，評估身體的反應，止疼藥仔免食，所有煩惱的代誌攏無發生。
　
佇面冊PO出發的消息，二姐回講：知女莫若母，天頂無梯，若無天頂妳嘛爬起哩。
二姐叮嚀我，風颱天出外著細膩。
我從細漢就愛耍，所以阮阿娘定唸講，準若有天梯，我會爬起哩。無毋著，若是會當爬起哩天頂看一下，汝敢袂好奇？若我、是絕對會。
　
真忝，就會得著一暝無眠夢好睏眠的奬勵。

拜六透早六點外食早頓。
七點外出發，佇面頭前就一个崎崎的出口，若衝無起哩，著工作人員捒，彼是真歹勢的代誌。欲起哩進前，有人講：撨1速、電放第5段，平路先衝一段才上崎。照這个撇步，真正予我上崎成功。第1个難關渡過，內心加真有信心，昨昏來看著彼个大大大的起崎，大概嘛有法度吧？！
出發無偌久，崎就佇頭前，經驗予咱知影，上崎的時，頭前若有人擋著路，一定著緊揣縫衝過去，若無佇上崎路段停咧，欲重起行就百倍困難嘍，這時陣若予人捒，捒的人嘛真辛苦。我複製前一遍的方式，衝啊！！
衝起哩啊，毋敢返頭看，嘛無等仝組的其他隊員，追向頭前的隊伍。一追，四五十分鐘無停睏，一直參頭前的隊伍有一段距離，看會著、追袂著、無想欲予後面的人追著，拚命一直衝。台南的曠野，真闊。
佇一个斡角的所在，一陣人停佇遐，講是咧等後背的人，才閣同齊行。這時陣聽講已經離開出發的所在17公里矣。這是我唯一脫隊，衝甲足爽快的一遍，閣起行，我就乖乖仔綴後面慢慢仔行。（好啦！講實話，其實我嘛無力通衝矣）
　
車隊行到市區的時，會有交通隊的警車佇頭前開路予阮行，我講：嗯！咱足成總統的呢。
邊仔有人應講：嘿！按呢想足好的。咱明仔載轉去，就會選總統［酸、腫、痛］。
予伊講著矣，今仔日才開始痠疼。毋拘無要緊，明仔載，我一定閣親像一尾活龍，照常上班。
　
轉來了後參阿勳講起，有人講，咱彼組彼个多重障礙的身障者，實在無適合參加這種活動。
阿勳才共我講，愛無礙協會理事長的理念是按呢，去佗位耍無重要，上重要的是欲予覕佇厝裡的身障者，會當行出來，遮若無予伊機會，應該真少有所在肯訓練伊、tshuā伊出門。

原來是按呢生！向愛無礙理事長行禮～

＊
tshit-thô=旅遊
精神=睡醒
沃澹=淋溼
押尾=押後
tshuā=帶領
上bái=最壞
斡角＝轉角