2019.07.27

下課，抾著這个景。
愈來愈珍惜每一个媠媠的景色。
　
起凊瘼是我熟悉真久的朋友
自捌代誌...
毋是、應該講從毋捌代誌，伊就守護佇我身軀內底，有時無陣探頭出來看一下。

這幾日，又閣來相揣。
想講忍一下
會記得有身的時捌發作，驚礙著腹肚內的囡仔，毋敢食藥仔，一直忍、一直忍，干但用温燒的米酒止癢，都ah予我忍過矣。
　
這改的忍，是知影過敏的藥仔一食落，症頭好去的時陣，嘛是規身軀無力的開始。愈有歲對過敏藥仔的反應愈重。
　
用百靈油抺三、四日，這搭退、彼搭閣浮出來。
照以早的經驗，若是遮濟工閣毋放我煞，就是欲我舉白旗的時嘍。
若無，忍甲像頂遍半暝仔走急診，去予醫生罵：這會休克妳敢毋知？
　
昨早起八點半吞藥仔，免半點鐘就毋知啥貨叫做癢，有夠好用！

十點外，人開始無力，硬擋！
中晝轉來歇半點外鐘，想講若閣無力，就欲請假，佳哉閣會當出門上班。

昨暝七點外開始睏，睏甲早起六點外，時鐘強欲踅一liàn才起床。
愈睏愈愛睏。

會記得阮阿娘捌教阮。
人咧艱苦，毋通一直倒佇眠床，若會當起來，就儘量起來振動，才袂愈睏愈愛睏。
　
過晝、像一尾活龍去上課
下課、抾著這幅媠媠媠的圖。
是天公伯仔咧奬勵我的勇敢？！
定著是。

＊＊
起凊瘼=蕁麻疹
一liàn=一圈