2019.07.23

禮拜（7月21）台語讀冊會請許居士轉來講課。
　
我tshuā兩个合唱班的同學去聽課。其中一个是我仁愛的學妹。
學妹坐佇我邊仔，聽故事的過程，不斷輕輕發出［啊！］的讚嘆聲。
我知，彼就親像我十幾年前初次行入來台語讀冊會，拄著細漢時熟悉的語言，彼種歡喜佮毋敢相信的心情。

居士退休了後用真濟時間台譯繪本故事，而且講hông聽。
『鴨子、死神、鬱金香』這个故事雖然我聽居士講過幾何遍矣，毋拘每一遍，攏會聽出新的體會。

温故知新大概就是按呢啦。

鴨仔問死神講：我若死去了後，彼个水池仔會按怎？
死神講：水池仔會消失去，至少對你來講是按呢。

這段，予我想著我佮阮囡仔的對話。

最近囡仔轉來，我問伊，我若退休的時，勞保退休金做一改領、抑是逐月日領較好？
囡仔建議逐月日領。
我講：毋拘我若活無久，毋是會食虧？
囡仔講：啊妳都無佇咧矣，哪著閣想這个問題！

許居士講的故事，大部份有關生死，聽愈濟，對生死的問題愈敢面對，至少佇這个故事內底，死神就親像咱的朋友，毋但一點仔都袂恐怖，閣生做誠得人疼呢。

＊＊

tshuā=帶