汰會按呢問？我跤袂行，手猶好好咧，哪著人捒？

會來看醫生的每一个病人，論真看起來，攏是一个故事。

一个六、七十歲的婦人儂，跤khōng石膏，身材福相福相坐佇輪椅，咧共捒的應該是伊的翁婿，生做烏焦瘦仔烏焦瘦，看起來若像古早演笑詼的大箍玲玲佮矮仔財。
婦人儂講：我喙焦！
查埔人共輪椅停咧，去倒一杯滾水欲予啉。
佇這時陣伊的輪椅防礙人咧行的路線。
我想講，伊哪毋徙一下？
查埔人倒茶來，共捒徙位。
我才雄雄知影；伊毋是自細漢袂行，所以袂曉捒輪椅！
原來一台細細台仔的輪椅，嘛著學，才會曉捒啊？！

下晡下課轉來的路裡，看著兩、三隻貓仔囝佇路邊的樹仔跤耍，足古錐的。
忍不住停落來看。
細隻貓仔若像囡仔遐愛耍，跳懸、跳低，我共叫：貓咪！共我看一下，繼續耍。是飼貓的人講的『很親人的貓』。
載你轉來去好否？我按呢問！
做怹耍，無半隻貓欲tshap我。
　
雄雄對樹頂有物件滴落來肩胛頭。
靠夭、是一phû鳥仔屎。
無愛看矣，轉來去！

轉來到門口，兩、三隻貓咪咧等我。
飼貓、心情有温暖的感覺。
　
暗頓，煠一粒卵來配飯。
因為細漢時佇竹跤耍，若去予鳥仔屎滴著，阿母會煠一粒卵予阮食，講按呢較袂衰！
以早戇戇袂曉問，是按怎食一粒卵就較袂衰？
是講若問，序大人會講：問甲一枝柄，人都攏按呢講。

會使講這馬的囡仔較巧，你若無予伊一个合理的答案，一定無欲放咱煞。
啊咱以早都較戇，一路，question mark（問號）抾甲規倉庫，到今猶未消化了。

＊＊
tshuā妳來=帶妳來
khōng石膏=打石膏
tshap我=理我
一phû=一坨