聽著彼个聲觸動我心肝，想著阮阿爸。以早會用日語吟詩，就是這个味。
緊用手機仔共錄起來。
唉！可惜因為失電的mai-khuh，聲音大細聲無齊勻。
美好的代誌，參寡仔瑕疵，若像人生，無可能一路順風。

是講，過程瑕疵，較贏過袂當參與。
莎士比亞有名的喜劇「仲夏夜之夢」，有人改寫做台語的。頂日仔欲來斗六辦講座。
歡喜甲，想講佇咱斗六呢。
問蹛虎尾的朋友敢欲來？伊講會撨時間來。
講座前一日，先去看場地，才來決定欲坐快樂馬車ah是駛戰車。
看一下，心- -一陣冷。
舊建築，門e̍h-e̍h，樓梯gám-á有懸有低無平坦，。輪椅無可能，舉柺仔嘛khàng袂起哩。
共朋友講歹勢，無欲去。
朋友講，去到位會有人鬥相共，敢無欲試看咧？

坐輪椅hông扛、舉枴仔hông扶，除非是不得已，我無合意按呢。這毋是蓋重要的活動，就放伊去！

有人熱人肯幫忙無方便的阮，當然真感謝。
毋拘，阮用輪椅ah是枴仔當做跤，若會當參一般人仝款，自由行，按呢才是阮欲挃的生活。

文創區外口，風景嘛袂䆀。
春天的苦楝仔，淺淺的茄仔色，我咧期待！

**
tsūn=旋轉
hông=予人
mai-khuh=麥克風
e̍h-e̍h=窄窄
gám-á=階梯

khàng=這字....華語毋知欲按怎解說；歹勢！