2019.07.10

阮兄弟姐妹仔定定佇五日節進前縛粞粽，這種粽的滋味有阮細漢時的記持。

為著予我免除長途奔波，今年嘛是佇斗六縛粞粽。
阮囡仔有想欲學，毋拘彼時伊拄無閒通轉來。

粞粽縛了，我佇家族的群組講，粽ha̍h-á偆真濟。
囡仔講粽ha̍h-á有偆，另工轉來想欲學縛米粽。
Ha̋nn？囡仔想欲學縛粽？
我問講：自頭到尾你家己縛？
伊講：Hènn！

佇囡仔轉來進前，我去主婦聯盟共料款好勢。
縛粽進前兩、三工，先共豬肉切一塊一塊sīnn起來
這个方法是阮阿爸教的。
.... ....
肉一塊一塊切四角形了後，用豆油、粗的胡椒粉、米酒佮拍碎的蒜頭落去sīnn。囥冷藏。

sìn-suà共塗豆浸水，冰箱冷藏囥一暝，才閣徙去冷凍。

因為阿勳毋敢食肥的，用脥心肉嘛會使得。我這遍買鳥鼠仔肉（小里肌）來用。

長秫仔佮圓秫仔lām-lām咧（比例隨意，這遍是圓秫1公斤、長秫仔差不多半公斤），秫米洗好浸水差不多3點鐘。
因為囡仔講伊自頭到尾欲做一遍看覓。

就教伊咧切紅葱頭、切香菇（香菇切tn̂g-ko形的較好炒）。
蝦仁浸軟。

熱鼎下油，紅葱頭佮蝦仁先煏予芳、才閣下香菇落去炒。起鼎進前下胡椒粉、豆油佮淡薄仔鹽。
囡仔下鹽的時講：煮食佇這个時陣上歹決定，下濟驚siunn鹹，下少驚siuⁿ汫。
無毋著，所以經驗誠重要。

這時陣著考慮著肉sīnn的時已經有下豆油佮胡椒粉矣，所以欲下鹽著節一下。
無夠鹹無要緊，食的時會使搵豆油，若是siuⁿ鹹就無解矣。
豆油落鼎緊炒隨緊關火，豆油較會臭火焦。

餡炒好囥予冷，肉是冰的，縛粽的時温度差siunn濟的兩項餡，佮做伙較會歹去。

哦！著啦！一般縛粽的時著閣洗粽ha̍h-á，這遍縛米粽用的，是頂日仔縛粞粽偆的，略仔洗一下就會使得。

若是未洗過的粽ha̍h-á，欲洗進前著先用燒水浸予軟了後，予水道頭的水那流，一phiò-一phiò用菜瓜布洗予清氣，囥予離水（略仔含水無要緊，免等甲焦焦）。

等炒的餡冷矣，開始縛粽矣。

問囡仔塗豆欲佮餡同齊包、抑是參秫米tshiau做伙？
若是做餡，較無愛食塗豆的，食的時會使揀起來，若lām做伙較僫揀。
我愛食塗豆，會參較濟塗豆，囡仔佮怹阿爸講無差，就共tshiau-tshiau做伙。

囡仔共粽ha̍h-á提佇手，問講欲按怎áu？
我講：這ah著教哦？
應講：無妳敢開始縛粽就會曉？

我講：Hènn啊，阮細漢的時咧扮公伙仔，早就學會曉矣。
囡仔講：我細漢若欲出去參人耍，恁就一直共我叫轉來…..！
ah-m̄-tō真歹勢，細漢時無放你出去耍。
原來佇耍的當中，會當學著袂少物件。

一步仔一步教囡仔按怎áu、按怎縛。
若是纏粽索仔，阮大姐動作誠liú-lia̍h，三兩下仔就縛好，結彼種會當伸勼的活結，這招我無學著，只好用戇步，共囡仔講若欲學正確的，才去揣大姨學。
囡仔áu一時仔，áu袂四序，喙裡唸講：哇！我看遮个著縛甲明仔載矣！
袂啦！我對少年人有信心。
囡仔學著真緊，縛無幾粒，粽的形體就出來矣。

進度比想的較緊。
那做，囡仔那問
欲按怎節米佮料的數量？
.. ....
大姐講兩斤米差不多縛兩捾，（一捾20粒）。
兩捾40粒，咱就量其約仔共肉切四、五十塊。
下面是用40粒落去備料

鳥鼠仔肉2塊。
紅葱頭半斤較加。
一包蝦仁(半斤)
香菇一包
塗豆一斤用無完

我問囡仔，汰會想欲學縛米粽？
伊講看著恁若想欲食粞粽，阿姨、阿舅招招咧，就會曉縛。
後擺伊若想欲食伊細漢時米粽的滋味，著家己學起來，無、都無兄弟姊妹鬥記。

做米粽的形式百百款，有南部粽、有北部粽。啊若阮兜的料足簡單，高貴食材栗子、卵仁攏總無，有細漢時温暖的記持，就是上讚的滋味。

得欲縛好的時，雄雄想袂起來，生米縛的米粽，煠的時是愛用燒水抑是冷水？
佳哉有兩个阿姐佮一个妹妹通問，以早佇厝裡的時縛粽炊粿，怹較有咧鬥相共，我是取食爾爾。問阿姐講煠粽用燒水。

水hiânn滾，三十捅粒的粽，無甲兩捾，我共囡仔講攏下落，伊講看是貯袂落，我講安啦，媽媽攏嘛一斗煠3捾。
水咧滾，粽落鼎，煞無空間通閣下一塊盤仔共硩。（盤仔硩咧粽才會攏佇水裡）
汰會按呢？
敢講阮這遍縛較大粒？嘛無啊！這个欵問，一直到.....
　
煠半點鐘了後，囡仔欲共頂下捾相對換的時，我講以早我上驚這个動作，燒閣重，誠危險。

佇縛粽進前，我會共一捾20粒的粽捾分做2捾，一捾10粒煠好的時較好捾起來。

囡仔聽著，目睭展大講：所以媽媽你的一捾是10粒！
伊按呢問，我才雄雄想著，一捾10粒、佮一捾20粒的［捾］當然無仝，莫怪一个銅鼎仔煠粽煠甲彼臨（lím）。

佳哉，閣過半點鐘tháu開看結果。媠啦！

並我以早家己縛的閣較成功。一點仔都無懸低粒，連粽角嘛熟熟熟，而且鹹汫tu-tu仔好。
囡仔學縛粽的第一遍，成功！

後記：
乖囡仔，媽媽頇顢，生你1个爾，無生甲半隻ka-tsua̍h參你做伴。
佇遮用文字共縛粽的過程、備料等等，紀錄起來，予你另工無人好問的時、有文字通參考。
特別用華語翻寫一遍，予你讀起來較利便。
是講，台語你都會曉聽、會曉講，若有閒來讀用台語文寫的米粽，你會鼻著閣較芳的氣味哦！

**
粽ha̍h-á=粽葉
Ha̋nn？=啥？
Hènn！=對！
sīnn=醃漬
sìn-suà=順便
lām-lām咧=參雜
tn̂g-ko形=長條形
siunn鹹=太鹹
siuⁿ汫=太淡
siunn濟=太多
一phiò=一葉
tshiau做伙=攪拌在一起
lām做伙=放一起
áu=摺
ah-m̄-tō=啊不就
liú-lia̍h=敏捷
水hiânn滾=水燒開
lím=接近極限
tháu開=打開
tu-tu仔好=剛剛好