2019.06.07

阮6个兄弟姐妹仔無爸無母，做孤兒已經8年外矣。

阮小弟仔阿維的同學黑皮［happy］，嘛是三十外年來，阮規家伙仔的好朋友。
袂記得是阿爸過身第2年、抑是第3年，黑皮共阿維講伊夢著阿伯，講欲食粞粽；彼陣拄五日節進前。
　
為著欲予我毋免長途奔波，阿維招蹛北部的阿姐怹，來斗六縛粞粽。
自彼年開始，阮就定定佇五日節進前，佇斗六縛粞粽。
　
縛粞粽不比縛米粽，跤手著較濟。
大姐較有傳(thn̂g)著阿母的手藝。
從舊年到今，大姐身體一直無啥sù-sī。主角身體虛，本成毋敢想欲招怹縛粽。
後來阮囝咧問，今年敢欲縛粞粽，伊拍算欲排休假轉來看。我問阿維，敢會使得？阿維講招看咧。
　
縛粽的日期確定了後，囡仔煞講這期間公司員工出國渡假。
哥哥嘛佇這時間出差佇國外。
妹婿仔退休了後，投入大漢清韻朗誦、吟唱，有真好的成績，頭一工會當來爾，第2工著上課。又閣失去兩个助手！
黑皮今年拄好有代誌，嘛袂當鬥出跤手。
　
雖然人少、阮照計劃行。
大姐會曉縛粽、二姐會曉炒料、阿維會曉挨米！按呢大概無問題矣！
　
阿維問料欲款外濟？我去網路查往年仔寫的文章，傳予伊！
阿維去主婦聯盟訂料。
　
料提轉來。
浸米（米著浸三、四點鐘）、洗粽葉仔、炒āⁿ、挨米、teh米漿（teh五、六點鐘）第2工早起時nuá粿粞、包āⁿ、so油(油著so較厚咧)、縛粽。落鼎lueh炊，差不多2點外鐘，熟矣，這時陣是下晡倚3點。
　
熟的粽捾起來一粒仔一粒重sok過，阿姐講袂使縛siuⁿ-ân，若無炊起來的粽會吐舌，所以炊好索仔冗冗，若無重sok過粽會落（làu）落來。。
　
我咧洗粽葉仔的時，感覺量有夠濟，洗足久的，洗甲二姐來替手。敢有需要遮濟粽葉仔？總是，都買來矣，攏總洗起來。
阿維咧nuá粿粞的時，唉？！奇怪，以早nuá起來的量，若像毋是按呢呢！
阿維講，敢毋是長秫仔三斤、圓秫仔三斤、蓬萊米三斤？
我重新揣資料，無毋著啊！
　
去揣té米的袋仔出來看……….
靠腰！
台斤買做公斤，加偌濟出來？家己去算！
原來訂料的時，用米的量去配粽葉仔的數量，莫怪啥物都加出來足濟的
　
這馬的人台斤、公斤無啥會曉分。
阿維欲佇斗六寄物件去屏東，叫我敲電話予貨運公司。
我問怹：6尺長的物件，恁敢有咧送？
應講：無哦！
我閣問：啊180公分長的物件，袂使送哦？
應講：會啊！