2019.05.31

我雖然行動無方便，除非真正有困難，若無，我足袂愛開喙拜託人。
　
擲糞埽這个工課，從囡仔去外地讀冊了後，厝邊有講欲替我做，毋拘這毋是一、兩遍就煞的代誌，所以我拒絕厝邊的好意，誠認真學。
隔壁蘭姐巡矣巡，看著我走廊有糞埽，總會共我提去擲。
後來我糞埽攏毋敢囥走廊攏。
　
經過jiok糞埽車的重重困難，尾矣知影橋跤清潔隊內底有定點咧hông擲的糞埽車。誠方便！
　
定定去擲糞埽的時，會拄著顧車的工作人員，真好禮共我講：妳囥咧就好，我才來處理。
一个抑按呢講、兩个抑按呢講。
後來我就無客氣，共規包的糞埽囥車後台，無phiaⁿ起哩車後斗。
　
上班出門順suà擲糞埽，真多謝怹予我方便。因為上班時間人真濟，欲chhek一个會當擲起哩的馬勢，毋是遐簡單。
　
人就是按呢，久來，人予咱方便，咱當做自然。誠害！
　
頂仔，換一个少年仔咧顧車，我猶是順手共糞埽囥佇車後台。伊面仔變變，喙踅踅唸毋知咧講啥，我聽無。
閣一日，嘛是彼个少年仔顧車，看我無共糞埽擲去車後斗，誠歹聲嗽講：逐个若攏像妳按呢，我是欲thiám死hioh？
　
原來，我拄著一个秉公處理的清潔員。
足想欲應伊：是恁內底的人叫我囥遮的啊！
算了，毋通破柴連砧suà破lueh，後擺照步來就是，莫予人歹做工課。　
　
照規矩做其實嘛毋是蓋困難，做一站仔，就足慣勢矣。
　
這幾工，又閣換別人顧車，閣叫我［囥咧就好！］
我，無愛！