2019.05.22
從細漢就慣勢暗時仔nê蠓罩。 就算佇仁愛學校彼幾年,嘛是按呢。 來斗六了後,我欲nê蠓罩,伊煞講伊袂慣勢。
偏偏仔來遮第二暝,壁頂就出現一隻lâ-giâ,兩个舉柺仔的阮,對lâ-giâ一點仔都無才調應付,目睭金金看伊遐趖、遮趖,趖甲伊歡喜。我都想講,若有蠓罩保護,毋是較安心仔睏?
應該講是蠓罩內底有我太濟細漢時溫暖的記持,所以一直想欲覕佇彼內底。 伊的記持卻毋是按呢。伊講細漢時,規陣囡仔khîⁿ- khîⁿ佇蠓罩內底,感覺真ak-tsak。
就按呢,咱順伊的感覺,過著無nê蠓罩的日子。
雖然講代誌若久來就慣勢,毋拘nê蠓罩這層代誌,我總是思思念念。像咧數念以早的歲月。 重新共蠓罩nê起來,是佇結婚第10年。 彼時陣,囡仔略仔離跤手,肯家已睏一間房間,眠床較闊,蠓罩nê起來,睏著偌仔安心咧。
頂年仔重做一頂較大頂的眠床,閣較適合nê蠓罩。 平平仔仝一層代誌,每一个人感受往往有差別。
阮大姐夫佇怹tuā-sè-siān內底,算是上浪漫的。年仔節仔會買花送大姐。這馬兩人攏退休矣,三不五時仔會看著怹鬥陣出去食飯、啉咖啡。
大姐足愛看火金姑,便若阿姐合意的代誌,姐夫一般攏真歡喜陪伴。伊講阿姐快樂,伊就快樂。 阿姐捌講,啊都足奇怪,陪伴伊去看火金姑的姐夫,轉來的路裡,一个面仔tshàu-moo-moo,問ah毋講。 後來姐夫才共阿姐講:後擺莫叫我參妳去看火金姑好否?! 是按怎? 原來細漢時,暗暝的門口埕,夜蟲聲,火金姑的身影,攏是刻佇姐夫內心的痛疼。
無快樂的童年,會影響一世人的心情。做爸母的,著謹慎。
** nê蠓罩=掛蚊帳 lâ-giâ=大蜘蛛 khîⁿ- khîⁿ=纏住 ak-tsak=煩燥 tuā-sè-siān=連襟 tshàu-moo-moo=臉很臭
|