2019.05.19

已經想真久矣，按算今仔日欲去讀冊會聽［荔鏡記］
暝裡，見若精神就聽著落雨聲
　
夢裡，夢見參厝裡的人欲去坐火車
車票拆好閣有時間
逐个散開去揣家己愛耍的所在
　
聽著火車入站
身邊兩个人、車票欠一張
敲電話揣著提車票的人
大聲喝：火車來矣、袂赴矣！
煞精神
　
五點外，外口猶是落雨聲
落雨騎遠路，無妥當
決定無愛去讀冊
　
倒落下繼續睏
眠眠仔當中
發訊息予讀冊會的人
歹勢、今仔日缺席。
閣睏！
　
睏醒、八點外
窗仔外是藍色的天、白白的雲
真正袂赴矣！
袂赴的，毋是火車。是讀冊會
　
趁好天，去買菜
看著路邊一暝雨水損斷
花蕊紛紛
袂赴結籽、落塗重出世！