 
字體：小 中 大 |
|
|
|
| 2020/05/12 16:40:52瀏覽42｜回應0｜推薦0 | |
2019.05.11 ：「阿容仔，來！妳看，這就是大紅花，啊彼叫做燈籃仔花。」
這是阿姐細漢時，參伊呀佇閘門跤看花的對話。 聽講阮遮个小弟小妹猶未出世的時，阿姐是厝裡的［公主］。阿公疼、阿爸惜，伊呀嘛定定參伊耍，伴伊chhit-thô。 想講我若是阿姐，後來伊呀生一堆猴me-á，伊呀煞開始無閒通做伴，按呢，我毋知有法度像阿姐按呢疼惜小弟小妹否？ 記持內底，伊呀毋捌閒過，總是跤步mé-tshénn，偝我一直行、一直行。行佇冬天、行佇熱天，行佇去病院的路，行佇轉來厝裡的路。按呢行五、六冬遐久。除了偝我去醫跤，伊嘛著去田裡鬥做穡，轉來厝裡揣時間囤柴備糧，in草絪，sīⁿ鹹tuâ。 伊呀生六个囡仔，我定著是伊陪伴上濟的一个。連小妹仔出世無偌久，上需要阿娘偝、阿娘抱、阿娘疼惜的紅嬰仔時，攏共伊呀讓出來，偝我這个歹育飼［食命的第3查仔囝］。 一直到頂年仔阮阿姐分享伊細漢時，伊呀報伊認捌燈籃仔花、大紅花，我才知影我所認定的燈籠仔花，其實是大紅花。是講，大紅花都毋捌抗議過我叫毋著伊的名。 母親節，啥物花是母親花？ 有人講剪絨仔花、有人講金針花。 啊若阮阿姐講，燈籃仔花佮大紅花，就是阮的母親花。 送恁兩蕊母親花，無論是母親，無論是父親，祝福逐个，日子平安、順順仔過！ ＊＊ chhit-thô=玩耍 猴me-á=小孩 mé-tshénn=敏捷 sīⁿ鹹tuâ=做醃漬物
|
|
| ( 心情隨筆｜心靈 ) |
