二水這條路，頂仔我捌家己騎車對遮去台中，路景真媠，想欲翕相無『路肩』通停起來翕。今仔日坐佇車底，拚勢翕。
　
等愛無礙手搖車隊到位，阿勳欲參車隊佇集集火車頭『快閃』歕口琴。
　
阮開車較早到位，我入去踅火車頭內底賣物件的擔仔位，閣去車站內底等火車。都無咧等人，毋知按怎，看著火車入站嘛歡喜甲。
　
手搖車隊到位矣。兩个蹛台中我的同學，嘛參怹的團來遮聯誼。
口琴表演煞，去集集大樟樹大眾爺廟前食中晝。
　
國校仔六年、國中到這馬，已經無想欲算熟識有幾年矣。參同學食中晝配話，話較濟過飯粒仔，講袂了！
老雷講，這馬身障者出門，較愛騎機車，無愛開車。
因為停車著行路，已經無力通行。
　
原來毋是干但我按呢想爾。
騎車真方便，上無想欲便所，看著加油站，機車會當騎到便所門口。若開車，欲落輪椅真費氣、欲行路又閣無氣力。
　
逐个攏老嘍。其中一位同學的翁婿，嘛是阮仝屆的同學，已經退化甲袂當出來耍矣。
　
台中彼兩个同學攏做阿媽嘍。怹講手機仔內底攏嘛是孫。阮較頇顢，進度tòe袂著。手機仔內底攏是貓。
　
離別時，逐个都互相鼓勵，趁猶有力，著較捷出來行行咧。
　
車隊盈暗欲蹛的民宿是無障礙的住房，阮無留落來過暝。參同學約束，揣一工來去集集蹛無障礙民宿。

另工若欲去，著行竹山這條路。

因為回程，阿勳行竹山這條路，加足緊的。
　
路痴報路，有影毋好相信！

**
tòe路＝跟路