2019.04.29

阮阿爸的阿舅，也就是阮舅公，聽講真gâu講故事，阮阿爸是舅公真忠實的聽眾。

阮厝蹛庄頭，舅公蹛庄內。阮阿爸少年的時，暗頓食飽，就會去怹阿舅兜聽講古。
後來我對阿爸遐，嘛聽袂少故事，可惜，記持無好，精彩的故事記無幾个。

最近參二姐開講，想著阿爸講的- - 菜瓜琛仔的故事。

庄內有一个查甫人叫做 菜瓜琛仔。
伊有兩个囝，一个蹛庄內、一个蹛外庄。

菜瓜琛仔食老的時，兩个囡仔輪伙鬮飼老爸。

一个寒人的透早。
菜瓜琛仔擔一領棉被，勼佇庄佮庄隔界，一間廟仔公邊仔，舅公對遐過看著，問伊：菜瓜琛仔，你汰佇遮？
伊講：大囝伙鬮昨暝食上尾一頓，早起著去二囝遐食。一暝無食物件，kan2！到遮煞無力通閣行。

舅公講：今，飯坩內底閣有一寡仔糜，我貯予你食啦。

成碗糜仔食了，舅公問講：按呢敢有夠？
應講：會做得矣啦！

菜瓜琛仔棉被擔咧，閣起行！