昨昏下晡睏siuⁿ濟，昨暝倒佇眠床到半暝仔3點外猶足清醒，愛睏神是咧無閒啥？仙求求袂來！
食一粒鎮靜的藥丸仔，想講第2工免上班，睏一下較有咧。
誰知6點阿勳就起床(伊今仔日有參加活動)，早頓伊家己會攢，我家己淺眠，伊出去了後，安安靜靜的厝間，嘛無法度予我閣再入眠。
規氣起來，攢攢咧，我嘛出門！

睏眠無夠，毋敢想欲去遠路。
無設定目標，行到佗、耍到佗。

定定行對鎮北路遐過，想講，若一直行落去，毋知會到佗？
頂工問阿勳，伊講會行對樹仔跤（饒平），迵到西螺。
無，今仔日就共行看咧。

看著路邊一个媠媠的所在，寫紫藤湖公園。
原來是佇遮？！
捌看人佇網路貼消息，講遮是一个適合看落日的所在，捌有想欲來，攏無行動。看機車對厝裡來到遮，嘛才5公里外仔爾。
真害，蹛三十外年的環境，竟然遮呢生份，予我想起讀國中彼時陣，有一遍地理考了真bái，老師氣甲共考試單phiaⁿ對糞掃桶的動作。
相片翕了閣再行。

想講，一定有一个點，予我感動，予我停落來！
機車一路騎來到欲倚溪湖的時，聞著一陣足熟悉閣足遙遠的芳味，緊揣，是我細漢時的芳味。
就佇無偌遠的路邊，一兩坵開甲白白白單瓣的黃梔仔花，聽講這較歹種，這馬已經真少矣，花市咧賣的較濟是複瓣的。
著啦！就是這種景緻，就是這種氣味。
看田裡的花蕊，強欲謝去矣。怹敢是咧等我？
停佇邊仔，鼻一下夠氣。

足感謝天，失能的鼻仔，今年開始恢後聞芳的功能，就予我收著丫昌老師送我的黃梔仔花，閣予我來到這坵花田，享受花芳。

中醫師講的無毋著：會好啦！愛有耐心。

乖乖仔聽ＧＰＳ的，伊講按怎行，我就按怎行，真正無行毋著路矣。
聽講魚仔的目睭佇兩爿，想欲向目標行去，目睭攏會去予邊仔媠媠的景色餳去。
有影！看著足濟小路仔，會想講，若行入去，毋知會看著啥？不知不覺，就行甲揣無路通轉來矣。
今仔日魚仔的目睭無去予美景引誘去。

帶著滿足的心，返頭嘍！