講看無，是逐字攏會曉唸，毋拘伊鼓勵人的所在佇佗？我想無。

最近黃文宏教授傳一篇伊翻寫做台語文的［老人佮海］予我。
黃教授是斗六人，伊寫的台語文有斗六腔，羅馬字有法度十足表現家己的腔口，非常難得。我佇遮蹛二、三十年矣，讀著真親切，看著誠suà-phah，不知不覺一篇一篇一直讀落去。

下晡共看了矣。
看甲尾矣心情誠激動，目屎險險仔liàn落來。

會當體會冊底的意思，甚至感動，原因之一，是有歲矣，歲月教咱會曉真濟代誌。但是上大的原因，是我讀的是台語文。有一種直接入去甲冊底真深的所在彼種真實感，若像咱tō佇現場仝款。
　
我手裡閣有另外一个［老人佮海］台語版，另工閣來看一遍，一定嘛真精彩。
　
捌佇電台聽一个中醫師講，伊考中醫師的牌，考幾何年攏考袂過，一直到伊用台語讀遐的考試的冊了後，才考著！
我以早無啥相信，這馬我知影彼是真的！
　
母語，就是遮呢仔重要。

誠感謝肯將世界大冊翻寫成台語的台語人！

＊
suà-phah=過癮
liàn落來=掉下來